Shillong, Naiwieng 24: Ka Khasi Hills Autonomous District Council (KHADC) ka la pyntip ka la phah da ka Legal Notice sha u nongialam jong ka Seiñ Raij Jowai u Bah Chandalok Dkhar halor ka jingkren be-ain pyrshah ia ki District Council bad ia ki MDC.
“Mynta ka sngi u Secretary jong ka Executive Committee u la phah da ka Legal Notice sha u Bah Chandalok ban dawa ban pynshai halor ka jingkren jong u,” la ong u Chief Executive Member (CEM) jong ka KHADC u Bah Pyniaid Sing Syiem haba iakren bad ki lad pathai khubor ha ka sngi Thohdieng.
U la pyntip ba u Bah Chandalok Dkhar u dei u Chairman jong ka Arts Committee jong ka Seiñ Raij Jowai ha kaba u CEM u la kam ba une u rangbah ha ka sngi rakhe Seng Kut Snem ka Seng Khasi Kmie ula ong ba dei ban pynduh noh ia ki District Council namarba kim lah ban pynneh ia ka riti dustur.
“Ha Meghalaya ki don lai tylli ki District Council, u thew ia kano ka District Council ka bym lah ban tip hynrei ban shu thew kyllum lang ia baroh ki District Council ba kim treikam, ka long kaei kaei kaba bakla bad kaba ngim lah ban pdiang,” la ong u Bah Pyniaid.
“Namarkata nga kyntu ia une u rangbah ba u dei ban pynshai halor kane ka nongrim ba u la kren ban kynthup lang ia ngi baroh. Phi dei ban pynthikna, kiei kita ki District Council kiba pynduh ia ka riti dustur bad kino kita ki District Council ki bym bit bym biang,” u la ong bad bynrap, “lada kim don ki District Council, shaei ki nongsynshar, ki Syiem, ki Doloi, shaei ki nong synshar raid, ki rangbah shnong, ki doloi kin poi.”
“Peit mynta ka Hima Khyriem bad Hima Mylliem, kiba dang bat ia ka niam ka rukom, lada ym don ka District Council 70 snem mynshwa ki la duh noh namar ngim ioh ia ka aiñ jingiada ba kyrpang ha ka riti synshar ka Ri India ban pynneh” ula ong.
Halor ka jingkynnoh bamsap, u CEM la ong ba um lah ban pdiang. “Une u rangbah u kren iano ruh ngim tip, u shu kynnoh lut ia baroh ki MDC bad ia kane hi daleilei ngim lah ban pdiang namar kane ka la pynhiar kyrdan ia baroh ki MDC hapoh Meghalaya” u la ong.
