Shillong, Risaw, 06: Ka kynhun State Disaster Response Force (SDRF) ha ka sngi u Blei ka la ïarap ban pynpoi ïa ki marbam mardih sha ki lanot shlei um ha kiba bun ki bynta jong ka thaiñ Dalu lyngba ka jingïatreilang bad ka Dalu C&RD Block
U kyrwoh ba la phah da u Additional Public Relations Officer (APR)) ka Directorate of Civil Defence & Home Guards, Meghalaya u Bah Paul Shylla u la pyntip ba ka kynhun jong ka SDRF ka la pynkit ïa ki marbam mardih sha ki jaka kum ka South Kujikura, ka Rengrampara ka Adanggri bad sha ka ophis Dalu C&RD Block.
Ha Barongpara, ka kynhun SDRF ka la hap ban jam ïa ka wah da ka lieng ba la shu shna da ka lakait ba la teh da u tyllai na ka bynta ban pynpoi ïa ki marbam sha ki nongshong shnong jong ka thaiñ.
Lah ban kdew hangne, ba ka kynhun SDRF ka la don ha Dalu naduh ka sngi Thohdieng jong ka taiew baladep hadien ba kane ka thaiñ ka la mad ïa ka jingshlei um na ka jingther jong u lapbah uba jur.
