Shillong, Naitung 03: Ki nongmihkhmat jong ka Dorbar Shnong ka shnong Rwiang kaba ha West Khasi Hills District ha ka sngi Palei ki la ïakynduh ïa u Chairman ka Meghalaya State Pollution Control Board (MSPCB) bad ki la dawa ba ka board ka dei ban sngap shwa ïa ka dorbar shnong ha shwa ban shim ka rai ban wengnoh ïa ka jingpynbna ba khang tala kaba la pynmih pyrshah ïa ka Shri Shakambari Ferro Alloys Private Limited.
Kane ka karkhana ka la shah khang khyrdep mynta la kumba 3 bnai naba ka la pynkheiñ ia ki kyndon ka ban ïada ïa ka sawdong sawkun, bad kumta ka dorbar shnong ka la kyntu ïa ka board ban pynthikna ba ka dei ban don ka jingbud ïa baroh ki kyndon ïada ïa ka sawdong sawkun ne ka environmental norm ha shwa ban ailad ïa ka karkhana ba kan plie biang.
U Sordar jong ka shnong Rwiang, u Bah Wiljou Iawphniaw, u ong ba ka rai jong ka board ban wengnoh ïa ka jingpynbna ban khang khlem da ïasyllok bad ka dorbar shnong ka la wanrah ka jingsngewkhia shaphang ka jingangnud ka board ban ïada ïa ka sawdong sawkun.
U Bah Mosklandar Marngar, u President ka Meghalaya Commercial Truck Owners and Drivers Association (MCTODA), u la ïathuh ba ka board ka la pynmih ïa ka jingpynbna ban khang ha ka 23 tarik u Rymphang, 2025, hadien ba ka dorbar shnong ka la leit ban khang ïa kane ka karkhana hadien ba ka la pynkheiñ ïa ki kyndon ban ïada ïa ka sawdong sawkun.
U la pyntip ba ha ka jingïalang ka board ka la pynshai ba ka rai ban wengnoh ïa ka jingpynbna ka long halor ka kaiphod kaba pyni ba kane ka karkhana ka la bud ïa ki jingbthah ban pynkhuid ïa u dpei napoh ka wah. Ha kawei ka liang pat ka dorbar shnong ka la kam ba kam shym pat ïohi ba ka don kano kano ka kam ba la shim da ka karkhana.
U Bah Marngar u la ong ba ka dorbar shnong ka la buh ka jingkylli ïa ka rai jong ka Board ban pynduna ïa ka kuna na ka T. 33.60 lak sha ka T. 8.40 lak, da kaba kynnoh ba kane ka pynhiar dor ïa ka jinglong kongsan ka longbriew manbriew bad ka jingdonkam ban ïada ïa ka sawdong sawkun bad ka mei mariang.
Ki la dawa ba ka board ka dei ban pyndon bynta lang ïa ka dorbar shnong ha kino kino ki kam ban shim ka rai khnang ban pynthikna ïa ka jingtreikam kaba shai bad kaba khuid.
U Bah Marngar u la pynpaw ruh ba ka dorbar shnong ka mad ka jingshah pynbor kaba jur bha ban shah plie biang ïa kane ka karkhana.
Ha kawei ka liang u la ïathuh ba ka jingïeng skhem ka dorbar shnong ka long kaba khlaiñ bad khlem khih satia. “Kumba la ong naduh ba sdang ba ka board ka dei ban pyndonbynta lang ïa ngi, kumta ka long kaba donkam ba kin ïaibteng ban pyndon bynta ïa ngi ha ki jingshim rai kiba kongsan, kum ka jingwengnoh ïa ka closure notice.”
Ha kawei pat ka liang haba kren sha ki lad pathai khubor, u Member Secretary Bah C H Chyrmang u la ong ba ka board ha kaba sdang ka la khang ïa kane ka karkhana haduh 3 bnai na ka daw ba ka pynkheiñ ïa ki kyndon ïada sawdong sawkun bad mei mariang.
Hadien ba la pynlong ïa ka jingleit jurip, ka task force ka la aiti ïa ka kaiphod kaba pyni ba ka karkhna ka la bud ïa ki jingbthah jong ka board. Kumta katkum ka kyrdan jong ka natural justice, ka board kam lah ban bteng ban khang sah ïa ka karkhana, bad namar kata ka la wengnoh ïa ka jingpynbna khang tala ïa kane ka karkhana.
U la ïathuh ba ka board ka la pynjari ruh ka kuna ïa ka karkhana ba ka la pynjaboh ïa ka wah da kaba theh ïa u dpei. Hynrei ka karkhana ka la kyrpad, bad u chairman u la pynduna noh ïa ka kuna sha ka T.8 lak, da kaba bud ruh ïa ki guideline ba la pynmih da ka Central Pollution Control Board (CPCB) bad ba la pynskhem da ka National Green Tribunal (NGT).
U Bah Chyrmang u la banjur ba ka rai jong ka board ban wengnoh ïa ka closure notice ne ban plie biang ïa ka karkhana bad ka jingpynduna ïa ka kuna ka la long katkum ka aiñ.
U la bynrap ba na ka liang ka board kan ïaibteng ban peitngor ïa ki jingbud kyndon ka karkhna halor ki jingïada ïa ka sawdong sawkun.
