Shillong, Nailur, 05: U Principal jong ka Mynken Christian Higher Secondary School, Bhoirymbong u Babu Everlasting Pyngrope u la wanrah ïa ka nam ka burom ïa ka Meghalaya da ka jingshah pynkup burom ha ka President ka ri ka Droupadi Murmu da ka National Award ha ka jingrakhe ïa ka sngi burom jong ki nonghikai ha ka ri India baroh kawei ha ka sngi Palei.
U Babu Pyngrope u la shah pynkup burom da ka khusnam National Award for Teachers 2024 halor u synniang u bynhei ba u la noh sha u sup u thiar jong ka pule ka puthi bad ban kyntiew ruh ïa ka imlang ka sahlang.
Ka jingïoh khusnam ka long halor ki kam ba u la trei na ka bynta ban pynbha ïa ki skul, ban kyrshan ïa ki khynnah kiba donkam kyrpang. Ka skul jong u ka la pyndonkam ïa ka ICT lyngba ki Computer Lab bad ka Smart Class bad hikai ruh ïa ki khynnah skul ba kin pyndonkam ïa ka Technology kum ka lad jingpule kaba thymmai.
U la pynleit jingmut ban ai jinghikai ïa ki khynnah skul ha ka CWSN lyngba ki tiar hikai bad ka jingai jingmut da kaba ïatreilang bad ka District Social Welfare.
U Babu Pyngrope u la trei shitom ruh na ka bynta ka jingmyntoi jong ki khynnah ha ka thaiñ, khamtam eh na ka bynta ki khynnah skul kiba wan na ki longing kiba duk bad ki bym don lad ban bteng ïa ki jingpule kiba kham shalor ha ki jaka sor.
Kum ban shu pyntip hangne, ba ha une u snem, ka Jylla Meghalaya ka la ïoh kawei ka National Teachers Award na ka Sorkar Pdeng nalor ki 14 tylli ki State Award kiba la ai da ka Sorkar Jylla sha ki nonghikai na kylleng ki skul kiba don ha ki district bapher bapher ka jylla bad 36 tylli ki District Award.
