Shillong, Risaw, 23: Ka Kynhun Myntri jong ka Sorkar Jylla ha ka sngi Balang ka la mynjur ïa ka Meghalaya Private Medical Institution (Regulation of Admission, Fixation of Fees and Reservation) Ordinance, 2024 bad Meghalaya Medical College Regulation and Admission into MBBS course, 2024.
“Ka Kynhun Myntri ka la pdiang ïa ka Ordinance bad ngin sa ïakynduh biang ban thaw ïa ka Regulatory Body,” la pyntip ka Myntri ka Koit ka Khiah ka Dr. Ampareen Lyngdoh haba kren sha ki lad pathai khubor hadien ba la wai ka jingïalang Kynhun Myntri ba la pynïaid da u Myntri Rangbah ka Jylla u Conrad K. Sangma ha Resubelpara, North Garo Hills District.
Ka la pyntip ba ka Ordinance kan treikam mardor tang shu ïoh ïa ka jingshon muhor da u Lat ka Jylla Meghalaya.
“Yn sa pynbna ïa ka Regulatory Committee bad ha kaba ïadei bad ka jingbuhdor ïa ka bai pule, ka jingpyntreikam ïa ka bhah pule (reservation policy) bad ka jingmang ïa ki Seat katkum ki kyndon ka Sorkar bad katkum ki hukum ba la pynmih da ki Ingbishar bapher bapher,” ong ka Dr. Ampareen.
Haba kylli, ka Myntri ka la pyntip ba ka PA Sangma International Medical College jong ka USTM kan sa sdang ban treikam noh shen tang shu dep shon muhor da u Lat ka Ordinance.
“Mynta ngi ladep mynjur ïa ka bad yn sa shah ïa ka USTM ban sdang noh shen hadien ba ladep soi ïa ka Ordinance da u Lat bad ban sa pynbna paidbah,” ka la bynrap.
Shuh shuh, ka Myntri ka la pyntip ba ka Regulating Committee kan sa shong pyrkhat kumno ban kdew lynti ïa ka Pivate Medical College ha kaba ohdor ïa ka bai pule, ka jingdie ïa ki aplikeshon bad ka jingpyntreikam ïa ka bhah pule bad ka jingmang ïa ki Seat pule.
Ha kaba ïadei bad ka Medical College ha Shillong bad ha Tura ka Dr. Ampareen Lyngdoh ka la ong, “ngi don la ka jong ka por ba la buh bad ngi la pyntyllun shakhmat ha ka rukom kaba dei. Ngin sa poi sha ka thong ba ngi la buh ban pyntreikam pura ïa ka kolej pule doktor ha Shillong naduh ka samoi jong u snem 2025-26. Katba ka Tura Medical College ruh ka la la ïaid shakhmat bad ngi kyrmen ba ngin sa lah ban kynjoh sha ka thong ban pyntreikam noh naduh ka samoi jong u snem 2026-27.”
“Na ka por sha ka por, ngin sa pyntip sha ki paidbah nongshong shnong jong ka jylla ha kaba ïadei bad ka jingpyntyllun ïa kine ki ar tylli ki projek bad ngi kyrmen skhem ba ngin kynjoh sha ka thong ba la buh,” la kular ka Myntri.
