Shillong, Rymphang, 26: Ka tnat Sports and Youth Affairs jong ka Sorkar Jylla ha ka sngi Balang ka la pynkup burom ia ki saw ngut ki nongialehkai sports kiba dei ki dkhot jong ka Meghalaya Canoe Association (MCA) halor ka jingïoh khur ia ka takma ksiar, rupa bad rnong ha ka lympung ialehkai 38th National Games kaba la kut noh dang shen ha ka jylla Uttrakhand.
Ha kane kajuh ka sngi, ka Sorkar ka la pynkup burom ruh ia ki nongialehkai sports kiba la wanrah burom ia ka jylla da kaba jop ia ki takma ha ka National level kiba la long ha u snem 2024.
Ha ka jingialang kaba la long ha State Convention Centre, ia kine ki nongialehkai sports la pynkup burom da u Myntri Rangbah ka Jylla u Conrad K. Sangma ryngkat ka jingsakhi lang jong ki ophisar ba kynthup ia ka Kong Matsiewdor War Nongbri bad u D.D Shira bad ki nongialam jong ka Meghalaya State Olympic Association (MSOA) ba kynthup ia u Working President u John Kharshiing bad u General Secretary u Bah Finely Pariat.
U Vikash Rana uba la ïoh khur ia ka takma ksiar ha ka Kayak Cross u la ïoh pdiang ia ka khusnam pisa kaba 2 lak, katba ka Elizabeth Vincent kaba la ïoh khur ia ka takma rupa ha ka Kayak Cross ka la ïoh pdiang ia ka song pisa kaba 1 lak.
Kiwei pat ki nongialehkai kiba la ïoh khur takma ha ka National Games kiba la ïoh pdiang ia ka song pisa kaba 1 lak ki kynthup ia u Indra Sharm bad u Pynshngaiñ Kurbah kiba la jop ia ka takma rnong.
Ha kane kajuh ka sngi, ka Sorkar Jylla ka la pynkup burom ia ka Shillong Lajong FC kaba ialehkai ha ka I-League da kaba aiti ia ka song pisa kaba 1 klur tyngka.
