Shillong, Rymphang 7: Da ka jingthmu ban pynitynnat ia ka sor bad ban pynneh pynsah ia ka mei mariang, u Myntri Rangbah ka Jylla u Conrad K. Sangma ha ka sngi Balang u la buh ia u mawnongrim na ka bynta ban pyntreikam ia ka Riverfront Development Project ha shi lynter ka Wah Umkhrah kaba tuid na dohnud ka Sor Shillong.
Lyngba kane ka jingsdang, la mang pisa T. 39 klur ban shna pynitynnat ia ka rud wah jong ka Wah Umkhrah khnang ban pynduna ia ka jingjaboh jong ka wah kaba la pynswai haduh katta katta ia ka Wah Umkhrah.
Ha ka jingbuh ia u mawnongrim ha ka jingialang kaba la long ha Polo la sakhi lang da u Symbud Myntri Rangbah ka Jylla uba khmih ia ka tnat Pynroi Sor u Bah Sniawbhalang Dhar, u Myntri Sorkar Bah AL Hek, ka Deputy Commisioner jong ka East Khasi Hills ka Kong RM Kurbah bad kiwei kiwei.
Ha kane ka sngi, u Myntri Rangbah bad u Symbud Myntri Rangbah ki la aiti ia ka Cheque ba T.75 hajar bad T.1.50 lak lyngba ka My City Campaign sha ki Dorbar Shnong bapher bapher.
“Ngi la tyrwa mynshuwa ban pynkhuid ia ka Wahumkhrah bad Umshyrpi hynrei ka Sorkar India kam shym la mynjur ban mang pisa ia ka projek hynrei la bthah ia ngi ban bishar thymmai biang, kaba ngi dang leh mynta” ong u Myntri Rangbah haba kren ha kane ka sngi.
U Sangma u la ong ruh ba ka Sorkar Jylla ka la iatreilang bad ka Ministry of Jal Shakti na ka bynta ban pynneh pynsah ia ka jingkhuid jong ka Wah Umkhrah bad Umshyrpi.
“Nga kyrmen skhem ba katba kane ka project ka dang iaid ngi ngin nang pynkhreh ia ka projek ka ban kynthup ia ka jingpynkhuid ia ka Wah Umkhreh bad Umshyrpi kaba la donkam palat,” la ong u Sangma.
Ha kaba iadei bad ka jingkhapngiah ka Sor Shillong u la ong ba ia ki bynta bapher bapher la ithuh kum ki Multi Level Parking Lots bad ki Hawker Zone.
U la ong ba ka jaka ha Polo hapdeng ka Polo Towers bad ka Majestic Hotel ba khlem pyndonkam yn sa aiti sha ka tnat Pynroi Sor na ka tnat Forest ban shna kum ka jaka pynieng kali.
U la ong shuh shuh ba ka Sorkar ka la ithuh bun ki jaka hapoh ka nongbah, kynthup ruh ia ka jaka kaba don markhap bad ka Secretariat ia kaba yn sa shna kum ka jaka pynieng kali.
Halor ka jingkhapngiah ka Khyndai Lad bad Iewduh, na ka daw ka jingbym pyrkhing ia ka jingiaid ki kali, u Myntri Rangbah u la ong, “ka Sorkar ka la bishar bniah ia ki jaka ba khapngiah bad ka la wad ia ki lad ki lynti ban weng ia ka jingkhapngiah jong kine ki ar tylli ki iew ba kongsan da kaba buh ia ki jaka ban pynieng la ka jong ia ki Bos bad ki taksi.”
