Shillong, Nailur, 12: U Symbud Myntri Rangbah ka jylla uba khmih ïa ka tnat Commercial & Industries Bah Sniawbhalang Dhar u la pynbna ïa ka rai jong ka Sorkar ban ai tang shi sien ïa ka One-time Special Industrial Closure Scheme ba kyrpang sha ki nongtrei jong ka Mawmluh Cherra Cements Limited (MCCL).
Katkum ka jingong jong u, kam don kano kano ka jingtyrwa ban pynlong aiti noh sha ki riewshimet ïa ka MCCL hadien ba ka jingtyrwa ba kham mynshwa na ka bynta ka Joint Venture Partner bad ka MCCL kam shym la urlong satia na ka daw ka jingbym ïoh ïa ki nongkyrshan kiba biang.
“Namar ba ka jingpynthymmai ïa ka MCCL kam poi shuh shaei shaei na ki daw ka mariang, ka jinghiran pisa bad khnang ban pynthikna ïa ka jingsiew bailutksan kaba hok ïa ki nongtrei bad ki kynhun bapher bapher da ka jingthmu ban pynduna ïa ki jingeh ba ki la mad namar ka jingkhang khyrdep ïa ka karkhana la wanrah ïa ka One-time Special Industrial Closure Scheme na ka bynta ki nongtrei bad ïa ki kynhun bapher bapher ba la mynjur da ka Sorkar ha ka 9 tarik, Nohprah, 2024 ryngkat bad ka tarik ba la buh ha ka 31 tarik Nohprah, 2024 na ka bynta ki nongtrei bad ïa kaba la pyntreikam noh mardor. Ka pisa ban siew ka kot haduh T. 83.71 klur,” la pyntip u Bah Dhar haba jubab ïa ka jingkylli ha Ïingdorbar Thawaiñ ha ka sngi Thohdieng.
U la bynrap ba ka One-time Special Industrial Closure Scheme ban siew ïa ki mar ki mata jong ki suplaïar bad ki kontraktor ka long haduh T.7.73 klur bad T.6.81 klur ban siew ïa ki jingsiew kiba dang sah sha ki nongtrei barim.
Ka jingïateh bad ka Sorkar Jylla ka treikam haduh ka 25 tarik, Naiwieng, 2021 bad la mynjur ban pynjlan haduh ka 31 tarik, Lber, 2030 ban bud ryntih ïa ki kyndon ba la buh da ka Sorkar.
Ka jingïateh soskular bad u Syiem ka Hima Sohra ka la kut noh ha ka 25 tarik, Rymphang, 2022 na ka bynta ka jingshim wai ïa ka jaka ha Sohra kaba heh 354.58 akar ne 143.49 hektar bad ka jingïateh soskular bad ka Dorbar Shnong Mawmluh ruh ka la kut noh ha ka 13 tarikm Nailur, 2017 na ka bynta ka jingshim wai ïa ka jaka ha ka shnong Mawmluh kaba heh 345.13 akar ne 139.64 hektar.
Ka karkhana pynmih dewbilat jong ka MCCL kam shym la lah shuh ban treikam naduh u bnai Lber, 2020 hadien ka jingkhangdam ha ka ri baroh kawei na ka jingwan lyngshop jong ka khlam jingpang COVID-19 bad naduh u bnai Naitung, 2020 la pynlong ïa ki jingïakren ba bunsien da ka Sorkar bad ki kynhun bapher bapher.
U Bah Dhar u la ong ba ka katkum ka jingtih bniah ba la leh da ka IIFCL Pvt Ltd ka la kheiñ antad ba kan kot T. 190.32 klur ban pynim biang ïa ka karkhana.
Ka jinghiran pisa ka la khanglad ban sdang biang ïa ki kam, kaba la pynlong ban ym lah shuh ban siew ïa ki Bill jong ki suplaïar bad ki Agency kynthup ïa ka tulop jong ki nongtrei bad ka bainong sngi.
Ban weng ïa kane ka jingeh, ha u Naitung, 2021 ka Sorkar ka la mynjur ïa ka jingtyrwa ban wanrah noh da ka Point Venture (JV) na ka bynta ka Mawmluh Cherra Cements Ltd (MCCL).
Ïa ka Expression of Interest (EoI) la pynmih ha ka sien banyngkong bad lai tylli ki kynhun ki la jubab ïa ka EOI ha u Ïaiong, 2022.
Kawei na ki kompeni ba la tip kum ka M/s Arihant International Ltd, Guwahati ka la shah weng noh na ka daw ba kam kotbor satia katkum ki kyndon ba la kdew ha ka EoI.
Sa kawei pat ka kompeni M/s JK Cement Ltd, New Delhi ka la weng noh hadien kata.
Tang kawei ka kompeni kaba la paw ïa ka mon ka dei ka M/s Bhavika Commercial Pvt Ltd, Kolkata kaba la pyni ruh ïa ki jingbatai sha ka MCCL ha ka 30 tarik, Jymmang,2022 bad ha ka 18 tarik, Naitung, 2022. Hynrei ka la paw ba ka kompeni ka pynïaid bun tylli ki jaka shna dewbilat hynrei kam don ïa ka karkhana shna dewbilat bapura.
La bthah ïa ka kompeni ban phah ïa ki dulir katkum ki kyndon jong ka EoI. Wat hapdeng ka jingïai pynkynmaw, hynrei ka kompeni kam shym la lah satia ban ai ïa ki jingtip kiba bniah katkum ka jingdonkam.
Na ka daw ka jingbym lah jong ka M/s Bhavika Commercial Pvt Ltd, Kolkata ban phah ïa ki dulir ba donkam, ïa ka EoI na ka bynta ban wanrah ïa ka Joint Venture la pynkut noh ha ka 15 tarik, Nohprah, 2023.
