Shillong, Lber, 27: Ki nongïalam jong ka Hynñiewtrep Youths Council (HYC) Mawthawpdah Unit ha ka sngi Palei hapoh ka jingïalam jong u Secretary u samla Wellman Kharlyngiong ki la leit ban ïakynduh ïa u District School & Education Officer (DS&EO) ka South West Khasi Hills District halor ka jingdonkam ban buh noh sa kawei ka jaka thoh eksamin matrik ha Mawthawpdah Higher Secondary School.
Kumba long mynta ki khynnah skul kiba thoh ïa ka eksamin Secondary School Leaving Certificate ba ju pynlong da ka Meghalaya Board of School Education manla u snem ki hap ban leit shaduh ka shnong Rangblang bad sha ka shnong Shngimawleiñ, Jakrem bad shaduh ka shnong Mawkyrwat bad kane ka la pynshitom shikatdei eh ïa ki khynnah skul khamtam ïa ki longiing kiba duna ka ïoh ka kot.
Ha ka jingïakren bad ki lad pathai khubor u samla Wellman u la ong ba ka Presbyterian Higher Secondary School, Mawthawpdah ka la biang hi kumba long kiwei ki skul kiba la ïoh ïa ka Center thoh eksamin matrik kumta ka seng ka la sngew dei ba ki bor ba dei khmih kin buh noh sa kawei ka Centre khnang ba kan kham pynsuk ïa ki khynnah skul ban thoh ïa ka eksamin.
