Shillong, Naitung, 07: Ka Sorkar Jylla ka la phah tuklar ha u Special Monitor jong ka National Human Rights Commission (NHRC) u Rakesh Anthana ban ïoh pynkha ïa ka Sub-zonal Office jong ka Narcotics Control Bureau ha Shillong khnang ban pynngat ha ki kyndon ain ba tyngeh ïa ki nongkhaii drok.
Ïa kane la pyntip da u Myntri ka Sorkar Jylla u Bah Paul Lyngdoh hadien ba la wai ka jingïalang hapdeng u Symbud Myntri Rangbah uba khmih ïa ka tnat Kam Pohiing Bah Prestone Tynsong bad u Rakesh Anthana uba la long teng u Director General (DG) jong ka tnat shipai BSF bad u khlieh ba mynta jong ka National Control Bureau (NCB).
Katkum ka jingïathuh jong u Bah Paul Lyngdoh, katkum kumba ka long mynta ki don saw ngut ki snar khaii drok kiba la shah pynngat ha ka Prevention of Illicit Traffic in Narcotic Drugs and Psychotropic Substances Act bad ki dang don ruh sa 12 ngut kiba lah ban shah pynngat ha kane ka aiñ.
U Bah Paul u la ïathuh ruh ba ka sorkar ka la pynsngew ha u Anthana halor ka jingtyrwa ba dang sahteng bad ka Sorkar Jylla halor ka jingthied ïa ki Scanner Vehicles, ïa kiba la bei pisa da ka Sorkar India namarba ka jingbym pat mang pisa da ka Ministry of Home Affairs.
U Special Monitor u la ïaroh ruh ïa ka jylla Meghalaya kaba la trei tyngeh ban khynra ïa ka jingpynrung beain ïa u drok.
Ha ka jingshisha ha kane ka jylla Meghalaya, ka jingïakhun pyrshah ïa u drok ka dei da ka jingïatreilang na baroh ha ka imlang ka sahlang ym kum ha kiwei ki jylla ba ka trei hi tang ka sorkar marwei, u la bynrap.
“Ngi la pyntip ruh ha u Special Monitor ïa ka thong jong ka DREAM Project kaba kynthup lang ïa kiba bun ki kynhun ha ka imlang ka sahlang, ki shlem pule, ki kynhun niam. U (Special Monitor) la ïaroh bad kular ruh ba ka NHRC kan ai jingkyrshan ïa kane ka jingthmu kaba bha,” la ïathuh u Bah Paul.
