Babu Kular Khongjirem
Dang tang khyndiat sngi mynta, ka party NPP kaba ïalam ïa ka Sorkar MDA-II ha Meghalaya ka la ïoh khwai ‘kha heh (MLA) na ka pung heh (Mylliem Constituency) bad ka party ka shad bad leh kmen bym lah batai shuh. U dei ruh u dohkha heh uba la ju mai bad sneng lem ïa kito ki kiwei pat ki para dohkha heh (MLA Congress) kiba la ngat ha kajuh ka ruh (trap) shi snem tam mynta. Phewse! uta uba la sneng, uba la pyni lem bad bein ïa kiwei, u la ngat lang syndon dui-ly-dui ïa lade.
Katkum ka jingphla jong kine ki dohkha (MLA), ki ïathuh shai ba ym dei ba ki ngat ha ka jingphruh (ki jingbam ba suh lang ha u khwai) kum u wieh,u ata, u puit, ka kber, bad kiwei kiwei hynrei ba ka NPP ka nang ban suh khwai da kata ka roi ka par (development) jong ka Constituency. Bun ki ïa ong ba shah kynnoh lalot bad shah tei pop ei ki briew ka Constituency na ka jingïoh jingbam bang jingbam thiang bad jingbam shngiam jong u MLA jong ki.
Kum ka dak jong ka jingsiew kylliang ïa ka Mylliem Constituency ba ka la ai sngewbha da u MLA jong ka, ka Sorkar MDA-II jong ka NPP lyngba u Deputy Chief Minister (Khasi Hills) uba bat ruh ïa ka tnat surok ne PWD, u la kular syndon jling ban ai bad pyndep noh syndon ïa ka surok heh bad ba jlih (4 lane National Highway) naduh na Rilbong bad jingkieng Umshyrpi haduh Bañiun khnang ban pynsuk bad pynaram ïa ki paidbah jong ka Mylliem Constituency bad kane ka surok jlih yn pyndep noh khlem artatien shuh hapoh u bnai Nohprah. Tip dei mynta hi u snem 2025 ne dei pynban ha u Nohprah jong ka snem 2028 shwa ban pynlong ïa ka general MLA elekshon ha ka jylla Meghalaya.
Hynrei, ki nong Mylliem kiba hiar bad kiew man ka sngi na katei ka surok ki la pynpaw ba ka jingkieng ha wah Umshyrpi ka dang sah khongreng bad ka surok ban pynmadan (levelling) ha lad Lummawbah ruh ym pat i don dak tih ei ei satia kat haduh mynta. Bun ki ïa artatien, la kata ka surok heh ba jlih kin ïoh ïaid shisha ne em mynta sa tang ar bnai tam eiei.
Lada kim pat ïoh ïaid hapoh ar bnai tam eiei naduh mynta, kata, ki nong Mylliem ruh ki la shah pynbiej bad shah pynngeit (convinced) lem kumba long ki nong Pynursla Constituency. Ujuh u briew uba la nang ban pynbiej ïa ki War manla ka san (5) snem, mynta u la sdang sa ban pynbiej sa ïa u Khynriam (Ri Lum).
Ngin sa ïa peit ha ka General MLA Election 2028, la u Khynriam un ngop shisha neem kumba la ngop u War shathie.
Lada la shah pynbiej sa ïa u Khynriam, kata, ka party NPP ka la bam jem ïa u Khynriam u Pnar,u Bhoi u War kiba dei ki paid Khasi baïar.
