Shillong, Lber 21: Ka Shillong Contonment ka la rai ban phah notice sha baroh ki nongshong Ïing beaiñ ha Lum Survey nalor ban ithuh ïa ki jaka ban pyndait ïa ki CCTV, ban lah peitngor ïa ki kam bymman.
Ïa kane ka rai la shim hadien ka jingïahiar jurip lang hapdeng ki bor District, ka Shillong Cantonment, ki Pulit bad u Rangbah Shnong ka thaiñ ha ka sngi Thohdieng.
Haba kren sha ki lad pathai khubor, u Chief Executive Officer (CEO) ka Cantonment u Ayush Maurya ula ong, “ngi la pynlong ïa ka jingïajurip lang. Ngi la ithuh ïa baroh ki jaka kiba donkam ban pyndait ïa ki kor CCTV”.
U la ong, “bun bha ngi la ithuh ïa kito ki jaka kiba ju jia ki kam bymman bad tang katto katne por ngin sa pyrshang ban pyndait noh ïa ki CCTV.”
Na ka liang jong u, u la pyntip ruh ba ki don ki jaka kaba ki briew ki la shong ïing beaiñ bad ka Board kan sa pyrshang ban leh eiei noh ïa kine ki briew.
Haba kylli halor kane, u Maurya ula ong ba ka Contonment kan sa leh da kaba tyngeh ïa baroh ki jingwan kyntur pud sha kane ka jaka jong ka.
“Ngin sa phah ïa ki notice, ngin sa ujor ejahar bad ngin sa leh eiei pyrshah ïa ki katkum ka ain,” ula iathuh da kaba bynrap, “Baroh ki nongshong ïing beaiñ kin ïoh shuwa ïa ka jingmaham ba ki dei ban mih noh. Katkum ka Rehabilitation Act, ngi donkam ban ai ha ki ïa katto katne ki jaka bad ngi donkam ban ïakren bad ka Sorkar Jylla ba kumno ngin ïarap ïa ki.”
Nalor kane, ula ong ruh ba kila dep ithuh ruh ïa ki katto katne ki jaka ba ïadei bad ka jingpynïeng kali. “Ngi donkam ban pynïadon bynta lang ïa u SP Traffic bad ngin sa leh sa kawei ka jingjurip halor ki surok ïaid kali kiba don ha kane ka thaiñ,” ïathuh u CEO.
