Shillong, Risaw, 07: Da ki hajar ngut ki riewngeit ka Balang Catholic na ri lum Khasi bad Jaintia ki la tuid sha ka jingleit ontep don burom ïa ka met ba dang sah jong u Rev. Fr. Hilarius Lamare ha ka 7 tarik Risaw, 2025.
Shwa ban rah ontep ïa ka met, la pynlong ïa ka Mass Bakhuid ha phyllaw jong ka iingmane St. Theresa Cathedral Parish, Jowai ba la pynbynta da u Bishop ka Jyllaniam Jowai u Most Rev. Ferdinand Dkhar bad u Bishop ka Jyllaniam Nongstoin u Most Rev. Wilbert Marwein bad la pynbud pat sa ïa ka jingai khublei khatduh na ki bor pynïaid jong ka Jylla Niam Jowai.
Kum ban shu pynkynmaw, u Fr. Hilarius u la kem pang ha ka 18 tarik, Jylliew 2025 ha ka por kumba 9 baje janmiet bad la rah noh mar mar sha Woodland Hospital, kaba don ha ka shnong Sabah muswang bad hadien ba ki doctor ki la pynthikna ba ka dei jingpang Stroke la pynkit sha Nazareth Hospital, Shillong bad la pynthiah hapoh ICU tad haduh ka sngi ba un da khlad noh na kane ka sla pyrthei ha ka 5 tarik Risaw, 2025 ha ka por kumba 8 baje mynstep.
U Phadar Hilarius u la long teng u Diocesan Administrator jong ka Jylla Niam Jowai naduh u snem 2011 haduh u snem 2015. U bat ruh kum u Vicar General jong ka Jowai Diocese naduh u snem 2015 haduh u bnai Nohprah 2020 bad ha kajuh ka por naduh u snem 2015 haduh ka sngi ban da khladnohh u la shakri kum u Parish Priest jong ka Cathedral Parish Jowai.
Nalor ka kam sharai mynsiem, u Fr. Hilarius u la long ruh u President jong ka Jaintia Hills Development Society kaba dei ka Social Wing ne ka seng trei mon sngewbha jong ka Jyllaniam Jowai naduh u snem 2011 haduh mynta.
Shuwa ban trei hapoh ka Jyllaniam Jowai kum u Diocesan Administrator, u Fr. Hilarius u la trei ruh ha Parish Umsohlait, ha Parish Mawkyrwat, ha Parish Mawkhar, ha St. Paul Seminary Upper Shillong, ha Parish Namdong, ha Cathedral Parish, Shillong, bad u la shakri ruh kum u Vicar General jong ka Shillong Archdiocese naduh u snem 2001 haduh u snem 2011.
