Shillong, Naiwieng, 10: Da ki phew hajar ngut ki riewngeit na kylleng ki Parish jong ki lai tylli ki Jylla Niam, kata ka Jylla Niam Bah Shillong, ka Jylla Niam Jowai bad ka Jylla Niam Nongstoiñ ki la pynshlei ïa u Lum Tyngkong, Laitumkrah, Shillong ha ka sngi U Blei ban ïashim bynta shitrhem ha ka Proseshon Iukharist ba shisien shisnem jong ka Jylla Niam Bah Shillong da kaba duwai bad rwai ïaroh ïa u Blei da ka jingriewblei.
“Ka Proseshon Iukharist ka dei ka jingpynpaw ïa ka jingngeit ha ka jingdon jong U Jisu Khrist ha ka Iukharist Bakhuid. Ym don kawei pat ka jingmane ha ka Balang Katholik kaba kham khraw ban ïa ka Iukharist,” la ong u kyrwoh ba la phah da u Vice General ka Jylla Niam Bah Shillong u Rev. Fr. Richard M. Majaw.
Ïa ka Mass Bakhuid ïa ka por mynstep la pynmynta da u Lyngdoh Sad jong ka Jylla Niam Bah Shillong u Most Rev. Victor Lyngdoh bad uba la rah ïa ka Sakramen ha ka jingïaid proseshon.
Ryngkat bad u Archbishop Victor la synran lang da ki dkhot ka Council jong ka Jylla Niam Bah Shillong, ki Parish Priest, ki Rector, ki Major Superior, ki Provincial, ki MLA, ki MDC, ka Deputy Commissioner jong ka East Khasi Hills, ki Ophisar jong ka Sorkar Meghalaya, ki nongmihkhmat na kiba bun ki Diocese jong ka Thaiñ Shatei Lammihngi ka ri India bad na kiwei pat ki bynta jong ka ri India.
Ha ka Mass Bakhuid, u Archbishop Victor haba pharia ïa ka Ktien jong u Blei u la ïaroh ruh ïa ka jingsbun mynsiem jong ki paidriewngeit kiba ju noh synñiang sha kiba bun ki kam jong ka Balang. “Ban ïohi ïa U Blei ha ka jingïaid lynti jong ka jingngeit ka long ka bynta kaba kongsan ha ka jingim jong ki Khristan,” la bynrap u Lyngdoh Sad.
U Lyngdoh Sad u la pynkynmaw ba 90 phew snem mynshwa, ha kane kajuh ka sngi, kata, ka 10 tarik, Naiwieng 1934, la pynkyntang Bishop ïa u Bishop Stephen Ferrando bad ïa u Bishop Louis Mathias da u Archbishop Ferdinand Perier ha kane kajuh ka jaka, kata ka Calbary jong ka Cathedral of Mary Help, Laitumkhrah.
U la pynkynmaw ruh ïa ka jingdap shi spah snem ka jingwan poi jong u mishoneri bakhraw sha u Rev. Fr. Constantine Vendrame SDB sha ri Khasi-Jaiñtia.
Ki la don da ki phew hajar ngut ki paid riewngeit kiba ïashim bynta ha ka proseshon ha ka por noh phai sngi bad kiba duwai na ki jaka bapher bapher jong ki sawdong sawkun ka Cathedral Parish.
Shwa ban pynkut ïa ka jinglehniam, u Lyngdoh Sad u la pynbna ïa ka jingrakhe jong u snem Jubili 2025 ka Balang Katholik halor ka phang “ki Pilkrim ka jingkyrmen” bad u la pynbna ruh ïa “u Snem jong ka Sakrament Jingpynïasuk”, ka Diamond Jubilee ne ka jingdap 60 snem ka ban sa long ha u snem 2029 bad ka jingdap 100 snem ka Jylla Niam Bah Shillong ha u snem 2034.
