Shillong, Rymphang, 16: Da ki spah ngut ki paid Garo ki la pynïasoh ïalade sha ka United Democratic Party (UDP) ha Langrin Constituency ha ka sngi Saitjaiñ ban ai jingkyrshan ïa u kyrtong jong ka party u Bah Pius Marweiñ.
Ïa ka jingpynïasoh jong ki paid Garo sha ka UDP la sakhi ha ka jingïalang kaba la long ha ka shnong Upper Rajapara, Rajapara bad ha ka shnong Goltapara.
Kum ban shu pynkynmaw ba ki paid Garo bad ki nongïalam ki jong ki kiba sah sha ki thain khappud ki dei ki dei ki nongkyrshan baradbah jong u MLA barim ka Ranikor Constituency u Martin M.Danggo hynrei namar ka jingkyntiap na kawei ka party sha kawei pat ka la pynjlep hi khait ïa ki paidbah nongkyrshan namar ka jingkyntiap seng shaba palat.
Ha kane ka kynti u John D. Sangma na ka shnong Khasiadop uba dei u kyrrong uba la ïakhun teng ïa ka elekshon MLA ha u snem 2018 na ka party NCP kaba la tip mynta kum ka NPP ha kane ka kynti u la pynïasoh pura sha ka UDP ban ai jingkyrshan bad ban pynjop ïa u Bah Pius Marweiñ uba long ruh mynta u MLA jong ka UDP na Ranikor Constituency.
