Shillong, ïaïong, 08: Ki nongïalam jong ka Khasi Jaiñtia Youth Students Union (KJYSU) Central Body ha ka Sngi Baar ki la aiti da ka dorkhas ha u Deputy Commissioner jong ka West Jaiñtia Hills District u AK Singh ban pynsngew halor ki jingjia aksiden ba khah khah ha lad surok Bypass Mih Myntdu West Jaiñtia Hills District.
Ha kaba ïadei bad kane, ki nongïalam ka seng ba kynthup ïa u President Bah Chemi Phawa bad u Secretary Bah D. Shulet ki la kyrpad ïa u Deputy Commissioner ban phah buh noh da u Speed-breaker khnang ban ïada ïa ka jingim jong ki briew bad ban tehlakam ïa ka jingniah stet shaba palat ki kali heh bad ki kali rit.
Ka Seng ka kyrpad ïa baroh ki nongñiah kali ban don ïa ka jingkitkhlieh haba niah kali ha surok khnang ban lait na kino kino ki jingjia ba sngewsih bad kyntu ruh ïa ki bor ba dei peit ban leh eiei noh mardor khnang ban ïada ïa ka jingim jong ki nongñiah kali bad ki nongleit nongwan.
