Shillong, Ïaiong 16: U Symbud Myntri Rangbah ka Jylla Bah Prestone Tynsong ha ka sngi Balang u la pyntip ba palat 750 tylli k shnong kin sa pynïasoh ïa ka surok hapoh ka Pradhan Mantri Gram Sadak Yojana (PMGSY) Phase IV.
Dang shen ha ka jingleit jngoh kaba ar sngi ïa ka rilum Garo, u Bah Tynsong u la shong ïa ka jingïalang pyrkhat kam bad ki tnat treikam ka Sorkar bad pynpaw ruh ka jingsngewhun ïa ka jingïaid shaphrang jong ki projek.
“Watla ngam don ïa ki nombar ba thikna, malu mala kumba 750 tam ki shnong ba thymmai ki bym pat pynïasoh da ki surok baroh shikatta ki snem, mynta yn pynïasoh hapoh ka PMGSY-IV,” u la ong.
U la bynrap ba la bynshet ha ka State Public Works Department (PWD) ban pynkhreh ïa ka Detailed Project Reports (DPRs), da kaba khot ïa ki tender, bad ban pynthikna ban pyntreikam ha ka por kaba biang katkum ki kyndon ba la buh da ka Ministry of Rural Development.
U Bah Tynsong u la ïaroh ïa ka tnat PWD bad ïa ki Engineer ha rilum Garo Hills na ka bynta ka jingtrei shitom ha ki bynta ba ladep jong ka PMGSY.
“Naduh ka PMGSY-I, ki jingpyntreikam ki long kiba la peitngor bha da ka Ministry. Hynrei ha kane ka kynt, ngi la thaw ïa ka rekod. Ka Ministry ka la kmen bha ïa ka jingïaid jong ka kam bad ka jingtrei smat jong ka tnat PWD,” u la ong.
U la ong shuh shuh ba bun na ki projek hapoh ka PMGSY-I, II, bad III ki la jan dep bad la khmih lynti ba yn pyndep noh ha kaba kut jong une u snem.
