Shillong, Nohprah, 23: Ka KSU Mawlai Nonglum Unit ha ka sngi Saitjaiñ ka la noh synniang da ki duli Godrej buh tiar, lai phew tylli ki nep syaid bad saw tylli ki doormat sha kawei ka jaka ri ia ki khunlung kaba don ha ka shnong mawlai Nonglum kum shi bynta ka jingrakhe ia ka Christmas.
Ha ka jingaiti ia kine ki tiar sha ka President jong ka Seng Kynthei Mawlai Nonglum ka Kong Mitimai Basaiawmoit la lamkhmat da u President ka KSU Mawlai Circle u samla Biangbor Paliar bad u President jong ka KSU Nonglum Unit Samla Wanstep Dkhar, u General Secretary u samla Edie Malngiang lem bad u General secretary jong ka KSU Nonglum Unit u samla Franky Lamin bad kiwei pat ki dkhot jong ka seng.
Ka Kong Mitimai Basaiamoit ka la iathuh ba kane ka Creche ba la seng da ka Seng Kynthei ka la kynjoh mynta la 34 snem bad ka la batai ruh ia ka jingthmu ba la buh ia kane ka jaka ri bad sumar ia ki khunlung kaba don 30 tylli ki jingthiah.
Ka la ong ruh ba ka jingdon jong kane ka Creche ka long ban iarap ia kito ki longkmie kiba kit khunrei kiba shu im kamai jakpoh da kaba leit trei bylla bad ki don ruh katto katne ngut kiba dei ki nongtrei sorkar kiba phah ri bad sumar ia ki khun ki kti jong ki ha kane ka Creche.
Ka la pyntip ruh ba ka dor ba ka Seng Kynthei ki shim ka long kaba rit bha haba ianujor bad kiwei kiwei pat ki Creche, namarba ka jingthmu jong ka Seng Kynthei ka long ban shim ia ka dork aba duna khnang ban kyrshan lem ia ki para longkmie kiba donkam ia ka jingiarap.
Ka Kong Mitimai ka la ai khublei kyrpang ia ka KSU Nonglum unit bad bad ia ka KSU Mawlai circle kiba don ka mynsiem ban noh synñiang lem sha kane ka Creche kaba dang donkam ia ki lad jingiarap.
U President jong ka KSU Mawlai Circle u samla Biangbor Paliar haba kren ha kane ka sngi, u la pyrto ia ki kam ba radbah kiba ka Seng Kynthei Mawlai Nonglum ka la leh bad iohi jngai naduh 34 snem mynshwa ban shim ia ka sienjam ban seng ia ka Creche da ka jingthmu kaba bha ban iarap ia ki paralongkmie kiba donkam ia ka jingiarap khamtam ha ki por ba ki leit sha ki jaka trei jaka ktah bad ki kam ka jong ki.
U la ai ka jingiaroh ruh ia ki longkmie kiba trei bad kiba sumar ia ki khunlung ha kane ka Creche watla ki don la ka ing ka sem lajong hynrei ki la len ialade ban peit ban khmih bad sumar ia ki khunlung naduh ka khuid ka suba bad ka koit ka khiah jong ki khunlung.
Kane ka jingshimkhia jong phi ka pyni shisha ba phi la long kum kita ki kmie ki baar jong baroh ki khunlung kiba wan ban pynsah ha ka Creche jong phi, la ong u President ka seng.
Ha shwa ba yn sa kut noh ka program ka la don ka jingia ot cake lang hapdeng ki nongkitkam jong ka KSU bad Sengkynthei kum shi bynta ban ia rakhe ia ka advance christmas.
