Shillong, Nohprah, 23: Ka Indian Red Cross Society (IRCS) ha ka sngi Baar ka la noh synñiang da ki tiar bad ki mar bam sha ki ar tylli ki longïing kiba mad ïa ka jingjia ba sngewsih na ka jingpluh jong ka ïing kaba ki shong ki sah ha ka shnong Mawlai Nonglum, Shillong.
Kum ban shu pynkynmaw, ki ar tylli ki longïing kiba la mad ïa kane ka jingjia ba sngewsih ki dei ka longïing jong ka Kong Kyntiewriti Sawkmie bad ka ïing jong ka Kong Beautilin Sawkmie.
Ïa ki tiar la aiti da u Chairman u Paiem Laborious Manik Syiem da ka jingsakhi lang u Rangbah Shnong ka Mawlai Nonglum u Bah JS War, bad u Rangbah Dong, ka Kong Badamonlin Thangkhiew kaba dei ka dkhot jong ka IRCS bad u General Secretary u Bah Andrew Nelson Sawian.
