Shillong, Naiwieng, 25: Ka Khasi Student Union, Nongthymmai Circle kum shi bynta ban kyntiew ia ki khun samla kiba don sap ha ki kam ialehkai ka la plie paidbah ia ka jaka kilan met ia kaba la tip kum ka Maitshaphrang MMA and Fitness Team, ia kaba la pynlong ha Lumiawblot Community Hall, Nongthymmai.
Ia kane ka Maitshaphrang MMA and Fitness Team la plie paidbah da u President jong ka KSU Seng Kmie u samla Lambokstar Marngar ryngkat ka jingsakhi lang jong u Rangbah Shnong ka Lumiawblot Pyllon u Bah Don Khongshei uba la long kum u Symbud Kongsan, u MDC jong ka Nongthymmai Constituency u Bah Latiplang Kharkongor nalor kiwei kiwei pat.
La pynbit pynbiang ia kane ka Maitshaphrang MMA and Fitness Team lyngba ka Sport Committee jong ka KSU Nongthymmai Circle bad ka jingplie ia kane ka shlem ka long kum shi bynta ban ailad bad ban pynshlur ia ki samla ha ka jingkilan met bad kumjuh ruh ban lait na ki jingdih kiba sniew khamtam eh ka jingjyllei jong u drok ha ka imlang ka sahlang.
Ha kane ka sngi la pynkup burom ia ki samla kiba la wanrah nam ha ka jingiakop niah saikil kaba la long ha Tawang Arunachal Pradesh bad ha Punmudi, Kerela bad kine kiba shah pynkup burom ki kynthup ia u Samla Apshai Griffit Ñiangti bad u Samla Ridor Ñiangti.
Ban pynbyrngia ha kane ka sngi ba la plie ia ka Maitshaphrang MMA and Fitness Team la don katto katne ka jingialehkai Mixed Martial Arts na ka kynhun jong ka MMA.
