Shillong, K’lyngkot, 07: Ka Health Experts Committee jong ka tnat ka Koit ka Khiah ka Sorkar Jylla ka la shong jingïalang ha ka sngi Baar hapoh ka jingpynïaid jong u Principal Secretary ban ïathir ïatai ha kaba ïadei bad ka kiphod halor u khñiang jingpang Human Metapneumovirus (HMPV).
Ka Committee ka la bishar bniah ïa ka jingma kaba don mynta bad bishar bha ïa ka jingpynkhreh jong ki State Health Machinery ha kaba ïadei bad ka jingïakhun pyrshah ïa u khñiang jingpang. Ka komiti ka la ong ba u HMPV um dei u khniang jingpang uba thymmai, u la saphriang hapdeng ki paidbah la bun snem bad la lap ïa u ha u snem 2001.
Haba pynmih ïa ki jingai jingmut sha ki paidbah, ka komiti ka la kyntu ïa ki paidbah ban bud ïa ki kyndon ba kongsan ban leh khuid leh suba, kum ka jingsait kti man ka por bad ka jingdeng ïa ki mask lada jia ba don kino kino ki dak kum ka jingpang shit bad suhkhriat, ban pynduna ïa ka jingma na kaba shah ktah ha ka jingring bad pynhiar mynsiem.
Ka Integrated Disease Surveillance Program (IDSP) kan dang ïai bteng ban buddien bha ïa ka jinglong jingman bad ka pynthikna ïa ka koit ka khiah bad ka jingshngaiñ jong ki paidbah ha kane ka aiom.
Ka tnad ka koit ka khiah jong ka jylla Meghalaya ka long kaba la pynkhreh bha bad kaba la pynkhlain bha ban ïaleh pyrshah ïa kino kino ki jingeh kiba mih na ka jingpang, la ong ka khubor.
