Shillong, ïaïong 26: La pynlong ïa ka Rozgar Mela 2025 mynta ka sngi ha State Convention Centre, Shillong, ha ka jingïadonlang u Myntri Khynnah ka sorkar pdeng ba dei khmih ïa ka Tnad External Affairs and Textiles, u Pabitra Margherita, ka Chief Commissioner jong ka Income Tax, N. Longvah, bad kiwei ki kynrem ki lyndan.
Palat 51,000 tylli ki shithi thungkam la sam sha ki samla ba dang shu thungkam thymmai ha ki tnad bad ki kynhun bapher bapher jong ka Sorkar ha ka Rozgar Mela kaba 15 kaba la long ha 47 tylli ki jaka ha kylleng ka ri mynta ka sngi. Ha kane ka jingïalang, la aiti ïa ki shithi thungkam sha ki candidate kiba la shah jied na ki tnad treikam bapher bapher, kynthup ïa ka Income Tax, ka Tnad post, ka Geological Survey of India (GSI), bad ka Indian Railways.
Ha ka jingai jingkren jong u, u Pabitra Margherita u labatai ïa ka Rozgar Mela kum ka khyrdop ban tei ïa ka ri India kaba kham khlaiñ, “Kine kim dei tang ki kam; ki dei ki khyrdop ban tei ïa ka ri. Ha kine ki shi snem shiteng, ngi la pynlong ïa ka jingpynrung kam da ka jinglong hok kaba pura, kaba pyni ïa ka thong jong ka sorkar jong ngi,” la ong u Myntri.
“Ka long kham palat ïa ka shithi. Ka jingïaid lynti jong phi shakhmat kam dei tang ban tei ïa ka kam hynrei ban nohsynñiang sha ka khana jong ka jingkiew shaphrang ka ri India. Uwei pa uwei u nongshong shnong uba phi shakri u saiñdur ïa ka lashai jong ka ri India. To ngin ïaid lang shaphrang sha ka Aatmanirbhar Bharat, da ka jingkut jingmut ha ka jingngeit ha ka Sabka Saath, Sabka Vikas.”
Haba pdiang sngewbha ïa ki nongtrei ba thymmai ha ka jingai jingshakri paidbah, ka N. Longvah ka la ai khublei kyrpang bad pynpaw ka jingsngewnguh ïa u Myntri Khynnah jong ka sorkar pdeng uba la plie paidbah ïa kane ka jingïalang. “Ka Rozgar Mela ka pyni ïa ka jingangnud ba skhem jong ka sorkar ban pynmih ki lad ïoh kam hapoh ka jingïalam jong u Myntri Rangbah duh Narendra Modi,” la ong ka N. Longvah. Haba pynpaw ïa ka jingthmu kaba ïar jong ka Rozgar Mela, ka la bynrap, “Ka jingai ïa ki shithi thung kam mynta ka sngi kam dei tang ïa ki jingjop jong uwei pa uwei hynrei ka dei ka sienjam ba ïatylli ban pynkhlaiñ ïa ka jingai jingshakri paidbah ha ka ri.”
Da kaba bynrap ïa ka jingsngew jong ka ri, u Myntri Rangbah duh Narendra Modi u la ai jingkren lyngba ka video conferencing. Haba pynpaw ïa ka bynta jong ki samla ha kaba tei ïa ka ri, u Myntri Rangbah duh u la ong, “Haba ki samla ki noh synniang shitrhem ha kaba tei ïa ka ri, ka ri ka mad ïa ka roi ka par kaba stet bad ka ïoh ïa ka jingithuh ha ka pyrthei.” U la ban jur ba ki sienjam kum ka Skill India, Startup India, bad Digital India ki la plie lad ba thymmai ïa ki samla jong ka ri ban pynurlong ïa ka sap ka phong jong ki. “Mynta, ki samla jong ka ri ki pyni sha ka pyrthei ïa ka sap kaba khraw kaba ngi don, lyngba ka jingaiti bad ka jingsaiñdur thymmai,” la ong u Myntri Rangbah duh. Haba ai khublei ïa kito kiba ïoh kam thymmai, u la bynrap shuh shuh, “Ka jingïoh kam jong phi ka dei ka jingmih na ka jingtrei shitom bad ka jingkut jingmut jong phi. To sngew sarong ïa ka lad ban shakri ïa ka ri.”
Ka Rozgar Mela ka dei shi bynta jong ka prokram thung kam ha kylleng ka ri, ha kaba ïa ki jingïalang la pynlong lang ha kajuh ka por ha 47 tylli ki jaka ha kylleng ka ri, kaba thmu ban pynkhlaiñ ïa ki jingai jingshakri paidbah bad ban kyntiew ïa ki lad ïoh kam na ka bynta ki samla jong ka ri.
Kine kiba la shah thung kam thymmai kin ïasoh bad ki tnad bapher bapher, kynthup ïa ka tnad khajna, ka tnad rel, ka tnad kam pohïing, ka tnad post, ka tnad Labour and Employment bad kiwei kiwei.
