Shillong, Nailar, 12: Ka Shillong Medical College ka dang ïaid shakhmat ban urlong da ka jingïakynduh jong u Myntri Rangbah ka Jylla u Conrad K. Sangma ïa u Myntri ka Sorkar Pdeng uba khmih ïa ka tnat ka Koit ka Khiah da ka jingkyrpad ban ïoh jingmynjur na ka National Medical Commission (NMC).
Ka NMC ladep ban pynlong ïa ka jingjurip bad ka College ka dang ïakhun ban weng ïa ki jingeh ban ïoh thung pura ïa ki nonghikai.
Katkum ka jingpyntip jong u Principal Secretary in-charge Health u Sampath Kumar, u la ong ba ka jingthung ïa ki nonghikai ka ladep lut nadong shadong bad kumba 90% na ki nonghikai ba donkam na ka bynta 50 tylli ki Seat ladep ban pynbiang.
Ka College mynta ka dang thung sa ïa ki Assistant Professors napoh ka jylla, katba ha ka kyrdan Professor yn thep la ka jong, u la ong ha ka jingïakren bad ki lad pathai khubor.
U Kumar u la pynpaw ruh ba kawei na ki jingeh kaba hakhmat eh ka dei ka jingduna ki nonghikai, ka mat kaba ym dei tang ha ka Shillong Medical College, namarba ka Tura Medical College ha Garo Hills ka mad ïa kijuh ki jingeh.
Ka jingthung ban pyndap pura ïa ki nonghikai la khmih lynti ba kan shim por, kaba lah ban shim por haduh 10-15 snem, namarba Medical Officer ki dang bteng ïa ka jingpule ha ka Postgraduate bad ban kham shemphang shuh shuh.
Haba kylli, u Kumar u la ong ba ka College ka dang ap ïa ka jingmynjur ban pynïaid shakhmat bad ka rukom thung nonghikai kaba dang sah.
“…na ka bynta 50 ngut ka Seat ngi la ïoh haduh 90% ki nonghikai ba donkam.Na ka bynta ki nonghikai kiba dang sah, ka jingtreikam ka dang ïaid shakhmat,” u la bynrap.
