Shillong, Naitung, 03: Ka jingïaibteng ban ai work order da katto katne ki MDC ba la shah rem jong ka Jaintia Hills Autonomous District Council haduh mynta mynne ka la pynbitar ïa ki MDC jong ka seng Cognress bad ka Voice of the People’s Party ha kaba ki la leit ban aiti da ka dorkhas ha u Deputy Chief Executive Member jong ka Council u Bah Lasky Rymbai ha ka sngi Palei.
Ki MDC jong ka Congress bad ka VPP ki kynthup ïa u MDC ka Shilliang-Myntang u Bah Daeimi Liam, ka MDC jong ka Narpuh Kong Deivipaia Tongper, u MDC ka War Central u Bah Jamshaphrang Pohtam bad u MDC ka Saphai u Bah Rikut Pareiñ.
Ha ka jingiakren bad ki lad pathai khubor ki MDC jong ka Congress bad VPP ki la ong kim pyrshah ia kano kano ka kam pynroi hapoh ki Constituency hynrei ki la pynpaw ka jingsngewkhia halor ka jingïai bteng ban dang work order sha ka Development Committee kaba dei jong u MDC barim wat haba la don u MDC ba la jied da ki paidbah.
