Shillong, Nailar, 03: Ka Confederation of Ri Bhoi People (CoRP) Seng kmie ha u bnai baladep ka la aiti da ka jingthoh sha u Deputy Commissioner jong Ri Bhoi District ban pyntreikam da u Pincode na Meghalaya ha ki shnong kiba dang pyndonkam ïa u Pincode na ka jylla Assam haduh mynta mynne.
“Ka shnong Patharkhmah kaba hap hapoh Hima Nongkhlaw bad kaba long ka Headquarter jong ka Western Ri Bhoi Civil Sub Division katkum u Pincode ka hap hapoh Assam bad kumjuh ka New Jirang bad Old Jirang ki shnong baheh hapoh ka Hima Jirang. Kane ka jingbakla ka lah ban ïalam sha ka jingkulmar hadien lada ki bor ba dei peit kim shimkhia ban pynbeit kloi” la pynpaw ka CoRP ha ka dorkhas ba la aiti sha u Deputy Commisisoner.
Ha ka dorkhas ka seng ka la pynpaw ba ka la ïoh ka jingujor na ki samla pule ka thaiñ kiba kynduh jingeh haba aplai online ha ki jaka pule ne haba aplai ïa ka scholarship ha jylla namar u Pincode ha ka EPIC ne Aadhaar Card u dei na ka jylla Assam bad don ruh kiba shah kyntait ban plie Account ha ki Bank namar ka jingbakla ha u Pincode bad kane ka buh la jingeh ïa ki paidbah ka thaiñ Ri Bhoi sepngi bad kiwei ki shnong ba pyndonkam ïa u Pincode 781131 jong ka jylla Assam.
Ka CoRP ka la kyntu ïa ki bor synshar jong ka Ribhoi District bad ki bor pynïaid jong ka Post Office Nongpoh ban pynbeit noh mardor bad ban pyntreikam da u Pincode na ka jylla Meghalaya ban lait na ki jingkulmar hadien habud bad ba ki samla pule kin ym duh ei ïa ki jingmyntoi ha ka pule ka puthi bad ka la bynrap, “ym lah ban tip ïa ki kam buit poh jong ka Sorkar Assam kaba lah ban kam trai wat ïa ki shnong kiba don ïa u Pincode na ka jylla Assam ha ka jingïakren pynbeit pud hapdeng ka Meghalaya bad Assam kaba dang ïaid shakhmat.”
Ha kajuh ka por ka CoRP ka la kyntu ïa ki Rangbah Shnong ka thaiñ ban pynbeit noh mardor ïa kane ka kam na bynta jingbit jingbiang jong ki paidbah nongshong shnong ka thaiñ Ri Bhoi sepngi, la ong u kyrwoh ba la phah da u Vice President ka seng u Bah Gershome Hat bad u General Secretary u Bah Markus Makri.
