Shillong, Naiwieng, 20: Da ki spah ngut ki samla pule ka skulbah NEHU, ki nonghikai bad ki nongtrei ha ka noh phai sngi jong ka sngi Palei ki la ïalum lang ha phyllaw ka skulbah NEHu ban pynlong ïa ka jingduwai ba kyrpang na ka bynta ka samla Darityngen Pohdukhei bad ka samla Stephanie kiba dang don mynta hapdeng ka jingshah sumar ha Nazareth Hospital hadien ba ki la shah tynrah ha kawei ka kali kaba la pynher stet bha hajan Gate-II ka skulbah NEHU ba la ñiah da u Parman M. Sangma.
U Bah Diwell Dhar, u Kpa jong ka samla Stephanie Shadap u la ïathuh ba ka khun jong u mynta ka la lah ban bam bad ka don ka jingmong ha u budlum bad ha ka shynrong khlieh.
U Kpa u la ïathuh ba katkum ka kaiphod jong ka X-ray ka don ka jingmong ha u budlum bad ha ka shynrong khlieh. Ka jinglang snam ha ka jabieng kam pat khuid bad ban pynkhuid ki doktor kin sa peit thuh shwa sa shi sngi ar sngi ki doktor kin sa rai.
“Lada donkam yn hap ban sumar bad lada ym donkam ka lah ban jem tang da kaba shu dih da ki dawai,” u la ong.
“Ngi don ka jingkyrmen ba i lah ban lait na ki jingpang kiba kham jur,” la bynrap u Kpa.
U la pynpaw ruh ka jingsngewnguh ïa ka Sorkar kaba la shim ïa ka jingkitkhlieh ban bei ïa ka bai sumar bad ban kem ïa u nongñiah kali uba donkti.
U Bah Phlening Kongthaw uba dei u Pasan jong ka samla Daritngen Pohduhkhei, u la ïathuh ba ki doktor ka Nazareth Hospital ki la hap ban khot da ki doktor na Guwahati ban sumar ïa ka namarba kam pat lah ban pynkhih ïa ka met.
“Hynne mynstep ka la don ka jingïapynbeit ban ïoh kit noh sha Guwahati hynrei na ka daw ba kam lah ban khih ki doktor ki ong bym long. Na kata ka daw ki pyrshang ban wanrah da ki doktor na Guwahati shane, u la ong.
U Bah Kongthaw u la pynpaw ruh ïa ka jingsngewnguh ïa ka Sorkar kaba la shim ïa ka jingkitkhlieh ban bei ïa ka bai sumar kaba la pyntngen ïa ka iing ka sem khamtam eh namarba ki kmie ki kpa jong kane ka samla ki dei tang ki nongrep.
“Haba ngi pyrkhat ïa ka jinglut jingsep ka la ktah bha ïa ngi bad ngi kyrmen ba baroh kan long hapoh ka jingpynïaid ba stad jong u Blei,” u la ong.
U la ïathuh ba ki doktor ki la hap ban pyndait ventilator ïa ka samla Daritngen.
Haba kylli, u la ïathuh ba ka samla Daritngen ka la mynsaw na ki bynta jong ka Ngab, ka bynta jong ka skhor, ka lbong, ka syngkai.
