Shillong, Rymphang, 13: Lai ngut ki briew ba la suba ba ki dei kiba ju mlien ban rong tuh ïa ki thuk thuk ar shaka ki la shah kem ha ki paidbah ka shnong Umthli, kaba hap hapoh ka Pynursla Police Station ha ka por kumba 9:30 baje mynstep ha ka sngi Thohdieng.
U Officer Incharge ka Pynursla Police Station tang shu ïoh jingtip halor kane, ryngkat bad ka kynhun ki Pulit ki la hiar sha ka shnong Umthli bad kem noh ïa ki lai ngut.
U kyrwoh ba la phah da u Superintendent of Police ka East Khasi Hills Bah Vivek Syiemk u la ïathuh ba ha kane kajuh ka sngi, uwei u briew uba la tip kyrteng kum u Rahul Thapa na Goenka Compound u la ujor da ka ejahar sha ki Pulit ban pyntip ba u la pynieng ïa ka Motorcycle YAMAHA MT-15 kaba don ïa u nombar ML05 AC 4622 ha parking lot ka Goenka Compound. Hynrei mynta ka sngi ha ka por kumba 11:30 baje mynstep u la shem ba ka thuk thuk jong u ka la jah.
Ki pulit ki la register case ha Sadar Police Station hapoh ka Section 305 (b) jong ka BNS.
U SP u la pyntip ba ki lai ngut kiba la shah kem ki dei kiba la tip kyrteng kum u Pyndapborlang Khonglah, 26 snem ka rta uba sah ha Pynursla, Wah Pathaw, u Bamkerlang Surong, 22 snem ka rta uba sah ha Sohlong, Wahkdait bad u Ïohborlang Mylliem Umlong, 36 snem uba sah ha Lawmei, Khliehshnong.
Ki Pulit ki la ïoh ban kurup kawei ka kali Hyundai Nios i10 kaba don ïa u nombar ML 05Z 5650, kawei ka kali tourist Alto 800 kaba don ïa u nombar ML 05N 4146, kawei ka mobile phone VIVO, kawei ka mobile phone Samsung, kawei ka mobile phone Poco.
Ka jingtohkit jong ki Pulit halor kane ka dang ïaid shakhmat ban lap ksai shuh shuh la ki dei neem kiba donkti ha kiwei pat ki jingrong tuh ïa ki thuk thuk ar shaka.
