Shillong, Risaw 11 : Ka Directorate jong ka Educational Research and Training (DERT), Meghalaya, Shillong, ka la plie pyrda ban rakhe ia ka jingdap 50 snem (1976-2026) ka jong ka ha ka 10 tarik u Risaw 2025, ha ka ophis treikam ka jong ka ha Nongrimmaw, Laitumkhrah, Shillong.
Ka phang pdeng jong kane ka jingrakhe ka dei: “Honouring the past, Empowering the present and Shaping the future.” La plie ia kane ka Jubilee Ksiar da u Minister jong ka tnad pule puthi, u Bah Lahkmen Rymbui kum u Kongsan, u Vijay Kumar Mantri, IAS, Commissioner Secretary jong ka sorkar jylla, Education Department kum u Symbud kongsan bad u Bah Ryntihlang Rapthap, IAS Commissioner Secretary jong ka sorkar jylla, Education Department kum u kongsan ba kyrpang ryngkat bad kiwei ki heh sorkar, ki nonghikai bad kiwei kiwei.
Ia kane ka Directorate la seng ha ka 4 tarik u Risaw jong u snem 1976, bad kum ka shnat treikam ka la lah ban pynioh ia ki jinghikai ba kyrpang (training) na ka bynta ki nonghikai. Lyngba ka jingiaid jong ka por, ka la pynwandur ruh ia ki curriculum, ki exam bapher bapher bad ki rukom wad bniah (research) kiba thymmai kiba iadei ha ka pule puthi. Ha kine ki 50 snem, ka DERT ka la lamkhmat ha ka jingpyniar ia ka rukom ai jinghikai bad iarap ban kyntiew ïa ka pule puthi ha ka jylla hi baroh kawei.
