Shillong, K’ lyngkot, 09: Ka Golden Jubilee and Farmers Expo 2025 ka la sdang mynta ka sngi ha ICAR Research Complex for NEH Region, Umiam, Meghalaya, kaba long ka dak jong 50 snem ka jingtrei shitom na ka bynta ka jingsaindur thymmai bad ka roi ka ha ka kam rep ha ki jylla ka thain shatei lammihngi jong ka India.
Ia kane ka prokram la plié paidbah da u Lat ka jylla Meghalaya, C.H. Vijayashankar ha ka jingiadon lang u Myntri Sorkar Pdeng ba dei khmih ia ka tnad kam rep & ka bha ka miat ki nongrep Shivraj Singh Chouhan, u Myntri Rangbah ka Meghalaya, Conrad K Sangma bad ka myntri Sorkar Meghalaya ba dei khmih ia ka tnad kam rep bad ka bha ka miat ki nongrep, Dr. M. Amapareen Lyngdoh, kiba la leit sha ki bynta ba kyrpang ba la pynkhreh ban pyni ia ka jingiar ka kam rep ha kane ka thain.
U Myntri Sorkar Pdeng, Shivraj Singh Chouhan, ha ka jingai jingkren, u la iaroh ia ki lad jong ka Meghalaya bad ka thain shatei lammihngi ban kylla sha ka jaka pdeng jong ki soh, ki jhur bad ki jingthung ba buh kai. “Ka Meghalaya ka dei kaba riewspah bha ha ka kam rep. Ka jingbun ki jait sohmynken, ki sohtrun, u sying, u shynrai, ki kait bad ki syntiew orchid ka dei kaba itynnad bha. Ka thain shatei lammihngi ka lah ban kham paw ia kiwei kiwei ki thain ha ka kam rep bad horticulture,” u la ong.
U la ban jur halor ka jingdonkam ban wanrah ia ki jait jingthung kiba kham neh, kyntiew ia ka logistics bad pynkhlain ia ka jingrah ia ki kam na ki laboratory sha ki jaka rep. “Ka ICAR ka dei ban peit ia ka jingpynneh kham slem ia ki jingthung jingtep bad pynthikna ba ki poi sha ki nongthied ha ka por ba ki dang bha. Ka jingrah ia ka science na ki laboratory sha ki jaka rep ka dei ban kham sted khnang ban ai jingmyntoi ia ki nongrep. Ka rukom rep tynrai, ki teknoloji ba saindur thymmai, bad ki lad kiba kyrpang jong ki jingthung kum ki siej, ka ngp bad ki tid ki dei kiba ngi hap ban pyndonkam ban kyntiew ia ka kamai kajih ha ki jaka nongkyndong,” u la bynrap.
U Myntri sorkar pdeng u la kren ruh shaphang ka jingialam lynti jong u Myntri Rangbah, Conrad K. Sangma bad u la kular ban bteng ia ka jingai jingkyrshan ia ka jylla. U la ban jur halor ka jingkongsan jong ka jingiatreilang hapdeng ka ICAR, ki skulbah kiba iadei bad ka kam rep, bad ki tnad Sorkar ban pynkhreh kam na ka bynta ka roi ka par kaba iaineh ha ka kam rep ha ka thain. U Chauhan, u la ban jur halor ka jingriewspah ka Meghalaya ha ki jingthung jingtep bad ki mrad bad u la ong ba kane ka dei ka spah jong ka thain bad u la ong ruh ba dei ban trei shitom ban pynkhreh ia ka rukom treikam. Ka long kaba donkam ban wanrah ia ka jingiatreilang kaba kham bha hapdeng ki dkhot ka ICAR, ki skulbah kiba iadei bad ka kam rep, ki KVK bad ki tnad Sorkar jylla. Ka suinbneng ka kylla ha ki bynta bapher bapher jong ka jylla bad kumta ngi donkam ia ka jingiatreilang hapdeng ki tnad bapher bapher, khamtam ban wanrah ia ka jaka pdeng na ka bynta ki kam logistic, processing, value addition bad ka jingbuh dor ia ki mar.
U kongsan ha kane ka sngi, u Lat ka jylla Meghalaya, C.H. Vijayashankar u la ban jur ba ka India ka dei ka ri kaba shaniah bha ha ka kam rep ha kaba kane ka kam ka don ha ka tynrai jong ki briew bad ka ioh ka kot. U la ong ba ka ICAR ka ialam lynti ha ka jingwad bniah bad ka roi ka par ha ka ri ha kaba iadei bad ka kam rep da kaba bynrap ba ka ICAR ka la noh synniang bha ha ka jingwanrah ia ki jait mar rep, ki jingri bapher bapher bad ka IFS kaba la iarap bha ia ki nongrep. Ka thain ka long kaba riewspah ha ki jait jingthung kiba kyrpang kum u sying bad u shynrai bad ka dei ka jaka pdeng jong ki dawai kynbat, ka Ayurveda bad kiwei kiwei ki jingthung jingtep, u la ong.
Ha ka jingai jingkren, u Myntri Rangbah ka Meghalaya, Conrad K. Sangma u la batai shaphang ka bynta jong ka ICAR ban wanrah ia ka jingkylla ha ka kam rep ha ka thain shatei lammihngi. “Naduh ba la sdang ia ka, ka ICAR ka la wanrah 100 jait ki jingthung, ki jingri kiba seisoh, bad ka la kyntiew ia ki rukom treikam ba iaineh kum ka rukom rep kaba bun bynta bad ka rukom rep organic. Kine ki sienjam ki la kyntiew ia ka jingshngain ha ka jingioh ia ka bam, pynneh ia ka jingreiwspaha ha kaba iadei bad ka jingbun ki jait jingthung bad ki jait mrad, bad pynkupbor ia ki nongrep lyngba ki teknoloji katkum ka juk mynta. Ka jingai jingithuh na kylleng ka pyrthei ia ki rukom rep organic bad ki rukom rep ba bun bynta jong ka ICAR ka pyni ia ka jingialam lynti ha ka kam rep kaba iaineh bad ka jingkyntiew ia ki jaka nongkyndong,” u la ong
U la iaroh ia ki sienjam jong ki stad science jong ka ICAR, ki nongwadbniah bad ki nongtrei ha kaba u la iaroh ia ka jingtrei shitom jong ki ban wanrah jingkylla ha ka kam rep ha kane ka thain. “Lyngba ki jingsaindur thymmai kum ka rukom rep organic ba bun bynta, phi la pynkupbor ia ki nongrep bad phi la plié lad na ka bynta ki samla ba kin seng kam lajong. Ki jingnoh synniang jong phi ki long kiba la iarap bha ha ka jingkyntiew ia ka kamai kajih ha ki jaka nongkyndong bad ka jingpynkylla ia ka kam rep ha ka thain shatei lammihngi.”
U Myntri Rangbah u la ai jingsngewnguh ruh ia u Myntri Sorkar Pdeng na ka bynta ka jingai jingkyrshan jong u ban kyntiew ia ka kam rep ha kane ka thain. U la iaroh ia ki sienjam kum ka Mission Organic Value Chain Development for Northeast Region, Rashtriya Krishi Vikas Yojana, bad PM-KISAN, kiba la ai ia ki nongrep ki tiar kiba kham bha, ki teknoloji bad ka lad ban pynpoi mar rep sha ki iew.
Ka President jong ka ri India, Droupadi Murmu ka la ai jingkren ha kane ka sngi lyngba ka jingkren kaba shu record. Ka la kitbok kitrwiang ia ka ICAR kaba la dap 50 snem mynta ka jingai jingshakri bad ka jingtrei shitom bad ka la ong ba ka ICAR ka la wanrah shibun ki jait jingthung jingtep, ki jingri bad ki teknoloji kiba lah ban iaineh na ka jingkylla ka suinbneng kiba iahap bad ka jinglong jingman jong ka thain kiba iarap ban kyntiew ia ka jingshngain ha ka jingioh bam bad ka kamai kajih ha ka thain shatei lammihngi. Ka la ong ba ka jingpynmih ia ki mar bam bad ki mar horticulture ka la kiew da 30% bad 40% ha kine ki 10 snem ba la dep. Ha kaba iadei bad ki kam kiba iadei bad ka kam rep, ka la ong ba kine ki jait kam ki la iarap bha ban plié lad kamai jakpoh bad ba ki la khring ia ki samla sha ka kam rep ha kane ka thain. Kane ka la ialam sha ka jingkiew 25% ki nongseng kam lajong ha ka kam rep da ki samla ha kine ki 5 snem ba la dep, ka la ong. Ka la ong ruh ba ka long kaba donkam ban buh jingtip bad pynshisha ia ki jingdon jingem tynrai, ka jingpynneh ia germplasm bad ka jingpyniasoh ia ka jingstad tynrai bad ki teknoloji katkum ka juk mynta.
