Shillong, Jymmang, 22: Ki kynhun bapher bapher jong ka skulbah North Eastern Hill University (NEHU) ha ka sngi Palei ki la ïai dawa hakhmat ka komiti ba arngut ki dkhot jong ka Ministry of Education, Sorkar Pdeng ba dei ban weng noh mardor ïa u Vice Chancellor Prof P.S Shukla.
U Additional Secretary, Sunil Kumar Barnwal (Department of Higher Education) ryngkat bad u Director, Subrat Kumar Pradhan (Department of Higher Education) ki la wan khnang ban sngapthuh ïa ka jingtreikam jong ka skulbah NEHU hadien ba la mih ka jingïakynad kaba jur hapoh kane ka skulbah ha kine ki khyndiat bnai baladep.
Kine ki arngut ki ophisar ba la phah da ka Ministry of Education ki la kyntait mardor ban ïathuh eiei halor ka jingïakynduh jong ki bad ki kynhun bapher bapher ka skulbah, ba kynthup ïa ki nonghikai, ki samla pule bad ïa ki nongtrei.
U Barnwal u la shu ong ba ka jingïalang, ‘ka biang,’ shwa ban mih na Administrative Block.
“Nga la shong jingïalang bad ki nonghikai, baroh ki Dean, ki Heads of Department. Ka jingïalang ka shu long kaba malu mala bad ngin trei kham bha,” la ong u Additional Secretary.
Ha ka jingïakren bad ki lad pathai khubor hadien ka jingïalang, u President jong ka North Eastern Hill University Teachers’ Association (NEHUTA) Prof Lakhon Kma u la ong ba ka jingïalang ka long kaba seisoh.
“Ka kynhun ka la wan hangne ban bishar ïa ka jinglong jingman kaei kaba ngi leh ha ka por ba dang don bad bym don u Vice Chancellor bad khamtam eh mynta bym don u Vice Chancellor. Ka NEHUTA ka la pynpaw ïa baroh ki jingeh (hakhmat ka kynhun),” u la ong.
“Ngi la kren da kaba shai ba ka jingwan phai biang jong u (Prof Shukla) kam dei ban dang don shuh ka lad,” la bynrap u Prof. Kma.
Haba kylli, u President ka NEHUTA u la ong ba ka kynhun bad ki kynhun bapher ka NEHU ki pynpaw beit ïa ka jingangnud ban pynkut noh ïa ki jingeh ba dang ïai bteng hapoh ka skulbah.
Katkum ka jingong jong u, ki dang pyrshang ban sngewthuh bad ha ïa kane ym pat lah ban shim rai eiei.
“Ki ruh ki tip ba ka la kylla long kaba ym lah ban shah ïa u (Prof Shukla) wat ban pyrkhat ba un dang wanphai biang sha ka Campus. Kumta ngi sngewskhem hadien ba ngi la ïakynduh ïa ki namar kumba ka paw ki kloi ban wad ïa ki lad ki lynti khnang ba ka NEHU kan wanphai biang sha ka jinglong kaba mynshwa,” ong u Prof Kma.
Ha kaba ïadei bad ka jingtohkit ba la thung da ka MoE halor ka jingkynnoh ba ka don ka jingbym lah treikam ha ka liang ka jingpynïaid ha NEHU, u Prof Kma u la ong, “ngi la tohkit bad ki la ong ba ki la pyndep ïa ka jingtohkit bad ngi dang bishar hynrei ka long kumba kumba ka paw ki la rai hynrei ïa kaei kaba thikna kim shym la ïathuh eiei ïa ngi hynrei ngi lah ban shu sngewthuh watla kim shym la pynpaw eiei.”
U la ong ba u Prof Shukla um shym la ïashim bynta ha ka jingïalang bad dei ka Pro Vice Chancellor Prof S M Sungoh kaba pynbeit nadong shadong ïa ka rukom treikam bad ka jingïakynduh hapdeng ka kynhun na ka MoE bad ki kynhun bapher bapher jong ka skulbah.
Da kaba pynpaw ïa ka jingsngewkmen hadien ka jingïalang, u Vice President ka NEHUSU u samla Ricky Deiburom Rabon u la ong, “ka jingïalang ka long kaba sngewtynnat bad ngi ai sngewnguh ïa ka kynhun jong ka Ministry kiba la wan sha ka skulbah ban sngap ïa ki jingeh jong ngi namar baroh shikatta ngi la ap khmih lynti ïa ka jingpynbeit kaba bha. Haoid, ngi kyrmen ba ngin sa ïoh ïa ka khubor kaba lah ban pdiang lut da baroh ki kynhun jong kane ka skulbah.
“Ka jingdawa jong ngi ka long kumba myshwa bad ngi ieng skhem halor ka nongrim ba long katba long ngin ym pdiang ïa u Prof. Shukla hapoh kane ka skulbah bad wat ki paidbah nongshong shnong jong ka jylla Meghalaya ruh ki ladep pynbna ïa u kum u briew ba la kyntait. Namarkata, ngin ym pdiang satia ïa u la ka long ha kano kano ka rukom,” u la bynrap.
