Shillong, Rymphang 07: Ka Hynñiewtrep Achik National Movement (HANM) ha ka sngi Thohdieng ka la dawa na ka tnat Bording ka Sorkar Jylla ban ai jingpynshai ha kaba ïadei bad ka jingai kontrak sha ka kompeni nabar jylla.
Halor kane, ki nongïalam jong ka Hynñiewtrep Achik National Movement (HANM) ki la pan jingpynshai na u Chief Engineer uba khmih ïa ka Meghalaya Energy Corporation Limited (MeECL) ha kaba ïadei bad ka jingai kontrak sha ka Star Infratech Firm, ka kompeni kaba dei nabar jylla.
U Vice President jong ka HANM u Bah Bawan Nongsiej u la pynpaw ïa ka jingsngewkhia ba kane ka kompeni kan ym don ïa ki kot ki sla kiba donkam, ba kynthup ïa ka Trading Licenses, Labour License, bad kiwei ki kot ki sla, kiba dei ban long katkum ki kyndon bad ki aiñ jong ka Khasi Hills Autonomous District Council (KHADC).
U Bah Nongsiej u la banjur ruh ba ki nongshong shnong jong ka jylla ki la lah ban pyntreikam ïa ka Revamped Distribution Sector Scheme. U la banjur ba ka Sorkar Jylla ka dei ban khmih shwa ïa la ki jong ki briew ban pyntrei ïa kano kano ka kam ha ka jylla, naba bun na ki samla ki mad ka jingkyrduh kam kaba jur bha ha kine ki sngi.
“Ka long kaba sngewsih ba watla don ki riew shemphang na la ka jong ka jylla ïa kane ka kam komtrak la ai pynban sha ka kompeni kaba nabar,” u la ong.
Na ka liang ka seng ka la ai por shi taïew ïa kane ka MeECL ban pynshisha ïa ki kot ki sla hynrei lym kumta ka MeECL ka dei ban pynsangeh noh ïa ki jingtreikam jong ka Kompeni.
Kane ka jingdawa jong ka HANM ka long ruh na ka bynta ka bha ka miat jong ki nongshong shnong bad kaba dei ruh na ka bynta ban kyntiew ïa ka bha ka miat bad kumjuh ruh ïa ka ïoh kam ïohjam jong ki samla hapoh ka jylla.
“Ngi kyntu ïa ki bor ba dei peit ba kin shim khia ha kaba ïadei bad kane ka kam bad ba dei ban ai lad shwa ïa ki briew jong ka jylla ban ai ïa ki kam kontrak,” ong u Bah Nongsiej bad bynrap, “ngin ym shong klikti ban shim ïa ki sienjam ban ïakhih lada kine ki jingdawa jong ngi kim longkam.”
Ka HANM ka la kynnoh ruh ba ka MeECL ka la pyllait ïa ka jingsiew sha kane ka kompeni khlem da pynshisha ïa ki kot ki sla kiba donkam bad ka dawa ruh ïa ka jubab na ka MeECL halor kano ka nongrim la shah ïa kane ka kompeni ban sdang ïa ka kam khlem ki kot ki sla kiba biang bad khlem ki jingpynshisha.
