Shillong, Risaw, 22: Ka Jaiñtia Joint Alliance (JJA) kaba la long ka Joint Committee jong ka War Jaiñtia Students Union bad ka Jaiñtia Youth Federation (JYF) ka la pan jingpynshai u Myntri Rangbah ka jylla u Conrad K. Sangma halor ka jingkam trai jong u Myntri Rangbah ka Jylla Assam u Himata Biswa Sarma ïa ka Block-I bad Block-II.
Ha ka shithi ba la phah sha u Myntri Rangbah ka jylla lyngba u Deputy Commissioner ka West Jaiñtia Hills, ka JJA ka la pynpaw ïa ka jingsngewkhia halor ka jingkren jong u Myntri Rangbah ka Jylla Assam u Himanta Biswa Sarma halor ka Block I bad ka Block II kiba hap ha ka United Khasi-Jaiñtia District ba mynshwa ki dei ki nongkynti jong ka Karbi Anglong bad ong ruh ba ka Sorkar Assam shen kan sa sieh da ki mawpud ban pynthikna ïa ka jingkam trai.
“Ka Jaiñtia Joint Alliance ka ïohi ba kum kine ki jingkren ki long ka jingma kaba ap ïa ka jinglong trai ri jong ka Meghalaya bad ka jingpynjah burom ïa ka jingsngew jong ka jaitbynriew Khasi-Jaiñtia, kaba ki jaka tynrai jong ki ki shah dawa khlem nongrim ha kawei pat ka jylla,” la pynpaw ka dorkhas ba la soi da u Chairman ka JJA u Bah Ombormi L. Tariang, u Chief Adviser u Bah Alban K. Gashnga bad u Secretary u Bah Everest Langstang.
“Namarkata, ka Alliance ka kyntu jur ïa u Myntri Rangbah ka jylla Meghalaya bad ïa ka Sorkar Jylla ban pynbna paidbah lyngba ki dulir sorkar ha kaba ïadei bad ka jingkren jong u Myntri Rangbah ka Jylla Assam,” la dawa ka JJA.
“Lada ym lah ban pynmih ïa ka jingpynbna kaba shai bad kaba skhem ka mut ba ka Meghalaya kam dei kaba la ïoh ïa ka jylla kaba pura hynrei kaba dang bteng ban long tang kum ka Subordinate Entity jong ka Assam ïa kaba yn ym lah satia ban satia da ki paidbah ka ri Khasi-Jaiñtia,” la kynthoh ka JJA.
Ka JJA ka la pynpaw ruh ba kan ym ailad ba ka khyndew ka shyiap jong ki kpa thymmai kin shah kyntur ne shah rong ha ki bor kiba nabar, la ka long ha kano kano ruh ka dur.
“Ngi kyrpad ïa ka ophis ba donburom jong phi ban shim ïa kane kum ka kam ba kyrkieh bad ban shim ruh ïa ki lad ki lynti ban ïada ïa ka burom, ka hok, ka jinglong trai halor ka jaka ka puta da ka jylla Meghalaya.
