Shillong, Naitung 11: Ki Nongmihkhmat napoh ka seng Bharatiya Janata Party (BJP) Meghalaya hapoh ka jingïalam u State President u Rikman G Momin, u Myntri Sorkar Jylla u Bah A L Hek bad u Nongaiktien ka Party u Bah Mariahom Kharkrang ki la leit ban ïakynduh ïa ki ophisar ka North Eastern Institute of Ayurveda & Homoeopathy (NEIAH) ban ïakren halor ki mat bapher bapher kiba ktah ïa ki jingeh jong ki samla pule.
Kane ka jingleit ïakynduh kadei ruh ban pynsngew ka jingsngew khia halor ka jingduna ki nonghikai khamtam ki nonghikai ba la shah thungkam pura ha kane ka jaka pule.
Ka kynhun jong ka BJP Meghalaya ka la dawa ruh na ki bor pynïaid ka NEIAH ban pyndap ïa ki kam ba thylli hapoh kane ka jaka pule khnang ba kan long ka jingmyntoi ïa ki samla pule.
Halor kane na ka liang u Director ka NEIAH u la pyntip ïa ka kynhun BJP Meghalaya ba ïa mynta ka dang ïaid ka Interview ban thungkam Contract bad ki don ruh ki kyrtong kiba la shah jied (Shortlisted).
U Director ula kular ïa ka kynhun ba shen ka NEIAH kan sa thungkam pura
hadien ba la ïoh jingmynjur ka ban shimpor sa kumba shi bnai eiei.
Haba ïadei bad kane na ka liang ka Meghalaya BJP khamtam u Myntri Sorkar u Bah AL Hek u la kular ban buddien halor kane ka mat bad ka Ministry ka Sorkar Pdeng.
Ka BJP Meghalaya ka kular ruh ïa ki Ophisar ka NEIAH ban ai ka jingkyrshan
khnang ban pynthikna ba ka jaka pule kan ïaid beit ïaid ryntih na ka bynta ka jingmyntoi ki samla pule bad ka jylla baroh kawei.
