Shillong, Nohprah, 26: Ka BJP Meghalaya Pradesh ka la dawa ïa ka Sorkar ban pynshitom da kaba tyngeh ïa ki briew kiba donkti ban pynjot dusmon ïa ki jingpynriam Christmas kiba la jia ha kylleng jong ka ri India shwa ka jingrakhe ki Khristan ïa ka Christmas.
“Ka Khristmas ka dei ka jinglehkmen kaba tehsong da ka jingieid bad kaba pynïatylli ïa uwei pa uwei u jingthaw iba im ha ka pyrthei. Ka dei ka jinglehkmen kaba la rakhe da ka jingsngewtynnat bad ka jingsngewrit ha manla ka jaitbynriew bad ïoh ruh ïa ka jaka kaba kyrpang ha ka dohnud jong uwei pa uwei u nong India, khlem da khein ïa ka jaitbynriew, ka jingngeit ne ka niam,” ong u kyrwoh ba la phah da u Nongaitkien ka BJP, Meghalaya Pradesh u Bah M. Kharkrang.
“Ha ka jingleit jngoh sha kiba bun ki bynta jong ka ri la ïohi ïa ka jingkhraw ka jinglehkmen da ka jingïashim bynta lang ha ka sngi Christmas. Hynrei hapoh kane ka jinglong jingman, ka long kaba sngewsih ban ïohi ïa ki katto katne ngut ki briew kiba pynleit jingmut ha ki jingïashun, da ka jingthmu ban pynthut, ban lehbeiñ bad pynthut ïa ka mynsiem jong ka Khristmas bad ïa ka khubor jong ka jingieid ba kyllum. Kum kine ki kam ki ïaid pyrshah ïa ka jinglong jong ka riti ka dustur jong ka ri India, ki hiar thma ïa kawei pa kawei ka nongrim, ïa kawei pa kawei ka dor kaba ngi don bad ki tah rong ïa ka ri baroh kawei da ka rong kaba sniew,” la ong u kyrwoh.
“Ka BJP, kum ka seng, ka ngeit ha ka jingïatylli bad ka jingïaryngkat jong baroh ki niam, ka bat ïa ka jingngeit kaba skhem ha ka riti synshar ka ri India bad ka ieng beit ban ïada tyngeh ïa ka hok jong uwei pa uwei u nongshong shnong ban rakhe ïa ki tamasa, ha ka rukom kaba u briew shimet u shim ba ka long kaba dei. Kane ka dang sah kum ka jingbym lah ban ïakren na ka bynta uwei pa uwei u dkhot jong ka seng jong ngi,” la pynpaw u Bah Kharkrang.
U la ong ruh ba ki don katto katne kiba na ka bynta ki jingmyntoi ha ka saiñ pyrthei, ki trei shitom ban pynskhem ïa ki kam jong ki khyndiat ngut ki nongleh kam sniew. Ka Meghalaya BJP ka kwah ban pynpaw ba u Myntri Rangbahduh ba donburom ryngkat bad ki nongïalam ba ha khlieh duh jong ka party ki ïashim bynta ha ka jingïaseng Christmas manla u snem, bad wat ha une u snem 2025 ruh.
“Ka dei ka nuksa kaba long kum ka jingai mynsiem ïa uwei pa uwei u dkhot jong ka seng jong ngi. Hato ki seng kiba pyrshang ban pynkylla ïa ki kam runar sha ki kam saiñ pyrthei ki lah ban ai kawei ka nuksa jong ki nongïalam jong ki bym dei ki Khristan kiba ïashim bynta ha ki jingrakhe Khristmas?” la buh jingkylli ka BJP.
Ka BJP Meghalaya ka ieng ryngkat bad uwei pa uwei u nong India ritpaid ha kaba dawa ba dei ban kem, ban bishar bad ban pynshitom ïa ki riewsniew kiba la leh ïa kine ki kam ba pynsngewsih bad kiba ktah mationg ïa ka jingsngew jong uwei pa uwei u nongshong shnong jong ka ri jong ngi, la dawa ka BJP.
“Katba ki nongïalam bad ki nongkitkam jong ka BJP Meghalaya ki la ïakren bad ki nongïalam jong ka party sha kiwei pat ki jylla ba la don kum kine ki jingjia ban pynthikna ba kito kiba donkti ha ki kam runar kim dei ban lait suk na ki jingshah pynshitom,” la bynrap shuh shuh u nongaitktien ka BJP Meghalaya Pradesh.
