Shillong, Nailur, 04: Ka Federation of All Meghalaya Adhoc Secondary Teachers Association (FAMASTA) ka la pynpaw ïa ka jingsngewkhia halor ka jingbym shimkhia jong ka Sorkar Jylla halor ka jingdawa ban siew tulop da ka Basic Pay plus Dearness Allowance (DA) na ka bynta ki nonghikai Adhoc.
Hadien ka jingïakynduh bad u Commissioner & Secretary uba khmih ïa ka tnat Pule Puthi u Vijay Kumar Mantri ha ka sngi Palei, ka President jong ka seng ka Kong Bina Kharumnuid ka la ong, “ngi la rai ban ïakynduh ïa u (Mantri) namar watla ngi la aiti ïa ki jingai jingmut jong ngi (ha u bnai Jymmang) halor ka Meghalaya Education Grant (MEG), hynrei ka Sorkar kam shym la khot ïa ngi ban ïamir jingmut. Kane ka la pynlong ïa ngi ban sngew ba ka Sorkar kam don jingsngew eiei ruh em na ka bynta ka bha ka miat jong ki nonghikai Adhoc.”
Ka FAMASTA ka la ïakhun ban pynïoh ïa ka kam kaba skhem bad ban pynjanai ïa ka jingsiew tulop sha ki nonghikai skul Adhoc, ha kaba ïa ka tulop jong ki nonghikai Adhoc la kyntiew na ka T. 1,800 sha ka T. 29,000 ha ki snem ba ladep.
Hynrei ka Association ka la dawa mynta ba ka Sorkar kan siew tulop noh da ka Basic Pay plus DA, ka jingdawa ba la sahteng naduh u snem u snem 2006.
Ka Kong Kharumnuid ka la ong ba ha ka jingïakynduh ïa u Mantri, ki la pynpaw ïa ka jingsngewkhia ba ka MEG ka lah ban ktah ïa ki nonghikai Adhoc, namarba ka tyrwa ba ïa ki kam ba thylli ynda la shongthait ki nonghikai yn ym pyndap shuh, kaba lah ban wanrah ïa ka jingma kaba lah ban shah ot tulop da ki School Managing Committee (SMC) ban thung ïa ki nonghikai ba thymmai. Kane, ka la kynthoh, ba kan ktah ym tang ïa ki nonghikai hynrei ïa ki khynnah skul ruh.
“Ngi la ïai ban ba ka FAMASTA ka dawa ba ki nonghikai skul Adhoc dei ban siew tulop da ka Basic Pay plus DA ban pynthikna ïa ka jingshngaiñ ka kam bad ban pynjanai ïa ka jingsiew tulop,” ka la ong.
Ka FAMASTA ka la kyntu ïa ka Sorkar ban shim ïa ki sienjam ba ïadei ban pynurlong ïa ki jingdawa jong ki, hynrei ym tang ban shu pdiang ïa ki jingai jingmut jong ki.
“Lada ngi kwah ban kyntiew ïa ka kyrdan jong ka pule puthi, ngi donkam ruh ban shimkhia ïa ka tulop jong ki nonghikai nalor ban jurip bha ïa ki skul bad ban pynbha ruh ïa ki iing skul,” bynrap biang ka Kong Kharumnuid.
