Shillong, Naitung, 09: Ka Federation of Khasi Jaiñtia and Garo Peoples (FKJGP) East Jaiñtia Hills ka la pynrem jur halor ka jingshah pyniap jong ki saw ngut ki briew ha kaba ia ka met ba la teh ia ki kti da u tyllai la lap ha lyndet jong ka iew Umpleng ha ka step sngi Saitjaiñ.
Napdeng ki saw ngut, lai ngut kiba la shah pyniap ki dei kiba la ithuh kyrteng kum u Ravi Rai, 23 snem ka rta na ka shnong Elam, Mechipradesh, Nepal, u Rajesh Rai, 26 snem na ka shnong Dharan Sunsari, Koshi Anchal, Nepal bad u Nasar Kyndait, 33 snem na ka shnong Dkhiah East Pohshnong, East Jaiñtia Hills District.
“Ngi pynrem jur halor ka jingshah pyniap dusmon jnog u Nasar Kyndait bad lai ngut ki bar jylla ha kine ki khyndiat sngi da ka jingleh riewkhlaw da ki katto katne ngut ki riewthrang snam bym lah ban ithuh,” ong u kyrwoh ba la phah da u President u Bah D. Sumer bad u General Secretary u Bah Emlang Sutnga.
Kum ka seng kaba peit ia ka bha ka miat ka seng kam lah ban pdiang da leilei ruh ban pyniap bein kum ki mrad bad lada dei shisha ba ki jingkynnoh katkum ba iohi ha ki lad pathai khubor ba ki saw ngut la suba ba ki lah ban dei ki nongdie drok lane ki nongdih drok ha ka jingsngew hi ba lada dei kumba kynnoh ruh ym dei ban leh riewkhlaw hynrei dei ban ai jingsneng da ka rukom kaba dei bad pyni ha ka rukom ba dei ban im, ong u kyrwoh.
“Lada shem ba ki tuh ki thiem ruh dei ban ai sha ki bor jong ka aiñ hynrei ym ban shim ia ka ain ha kti lajong bad ban thaw ruh ki lad ki lynti ban kin wanphai biang sha ka imlang sahlang kaba bha,” ong u kyrwoh na ka Seng.
Ka seng ka la dawa ia ki bor jong ka aiñ ba ki dei ban thwet tyngeh khnang ba kin ym lait suk na ki kynjri jong ka aiñ.
