Shillong, Nailar, 12: Ka Green Tech Foundation (GTC) ha ka sngi Baar ka la pynshai ba kam shym la pyrshah ïa ka jingshna surok Shillong-Dawki ïa kaba la pyntrei da ka National Highways and Infrastructure Development Corporation Limited (NHIDCL) kaba dang ïaid shakhmat hynrei ka pyrshah ïa ka jingtheh maw bad khyndew ha wah Umtyngar.
Ha ka jingïakren bad ki lad pathai khubor, u Chairman jong ka Foundation u Bah H. Bansiewdor Nonglang u la ong, “ngi la ïoh shibun ki jingujor na ki nongshong shnong halor ki jingpyntrei ïa ki surok. Ngim shym la mih ban long diengpynkiang ne ki nongpyrshah ïa ki jingtrei surok ne ïa ki kam pynroi.”
“Kawei ngi dei ban sngewthuh halor ka jinglong jingman ha Wah Umtyngngar, ka jingtrei surok da ka NHIDCL la shu pynlong ïa ka wah kum ka jaka theh khyndew, ka jaka theh maw, kat haduh ba ka wah kam don jaka shuh ban ïaid lynti,” u la ong.
“Ngin ïoh ïa ki surok, ngin ïoh ïa ki Ropeway bad ki Skywalk lada ngim don shuh ki tyllong umbam umdih bad ynda ngi la duh lut ïa ki um ki wah, ïa ki khlaw, kaei ka jingmut. Kaei ka ban jia ha ki san bad shiphew snem ki ban sa wan,” u la buh jingkylli.
“Ngi kwah ban phah kyrwoh sha ka NHIDCL ba kane ka long ka jingmaham wat pynlong ïa ki wah kum ki jaka theh khyndew, ki jaka theh maw, wat pynduh ïa ki wah ha kane ka jylla Megha laya. Ngi kwah palat ïa ki surok, ngi kwah palat ïa ki kam pynroi,” la maham u Chairman ka GTF.
U la ïathuh ba dang khyndiat sngi ka GTF ka la leit jurip ïa ka jinglong jingman jong wah Umtyngngar.
“Ngim shym pyrshah ïa ka jingpyntrei ïa ka surok (Shillong-Dawki), kata ka dei ka jingpynshai,” u la ong shuh shuh.
U la ong ba ka Wah Umtyngngar ka ai ym tang ïa ka umbam umdih, hynrei ka ai ïa ka um na ka bynta ka rep ka riang ïa ki shnong kiba sharum. “Lada kane ka wah mynta ka duh noh kaei ka ban jia, ngi hap ban pyrkhat mynta,” u la bynrap da kaba ai nuska ïa ka jinglong jingman jong ka Wah Myntdu kaba don ha rilum Jaiñtia.
“Katba ngi dang kren, katba ngi dang kyrpad sngewbha ban shimkhia ïa kane, hynrei ynda lashai ki sahkut ki PIL ha Supreme Court wat kynnoh ïa ka Green Tech Foundation. Lada ka wan ka Stay Order na ki iingbishar badonburom wat kynnoh ïa ka Green Tech Foundation,” la maham u Bah Nonglang.
Haba kynthoh ïa ka jingthmu ban shna ïa ka Ropeway u Bah Nonglang u la buh jingkylli da kaba ong, “ka tnat PWD Roads ka shna ïa ka Detailed Project Report (DPR) kaba kumno. Hato ka la don neem ka jingïathir jingmut kaba bniah. Ban shu pynlong kumne ïa ki wah bad ïa ki khlaw ka Foundation kam lah ban pdiang.”
“Lada phi mut ban pynduh bad pynjah ïa ki khlaw ki btap bad lada ki sahkut ki kam pynroi wat kynnoh ïa ka Green Tech Foundation,” u la ong shuh shuh.
Haba kylli, u la ong, “ka jingwan jong ki projek kam wan ka jingmut kaba janai, kam don ka jingïathir sani. Ym duna ïa ka 15-20 tylli ki wah, ki tyllong umbam umdih kiba la julor na ka jingshna ïa ki surok. Lada phi kren katba phi kren bad lada phi kynnoh sa katba kynnoh hynrei ka Foundation, lada ki wah kin duh kin dam ha ka kyrteng jong ki kam pynroi, daleilei ngin ym lah ban pdiang. Kane ka dei ka nongrim naduh ba ngi la pynkha ïa ka Green Tech Foundation. Daleilei ngin ym shah.”
U la ïathuh ba ka Foundation kan sa leit ban ïakynduh ïa ki bor ba dei khmih jong ka NHIDCL lada ka dang ïai bteng ban theh maw bad theh khyndew sha wah Umtyngngar ka Foundation kan phah khang beit.
Shuh shuh u la ïathuh hadien ba ka Foundation ka la pynmih ïa ki jingkynthoh ha ka Social Media ki la don ki tnat treikam kiba la kren sha ka Foundation bad ong ruh ba kum ka kynhun kam pat phah ïa kano kano ka jingthoh sha ki bor ba dei peit tangba ka Foundation kan dang ïai buddien beit ïa ka kam.
“Ka Megha laya State Pollution Control Board (MSPCB) ka dei ka kamram jong phi, sngewbha ban shimkhia. Khie leit peit ïa ka wah Umtyngngar kaei kaba jia. Ngi kyntu ba phin phah ïa ka kynhun ka ban leit tohkit (ha Umtyngngar),” u la ong.
“Ngi sngewthuh ba ka kam tih maw tih shyiap ka dei ka kam kamai jakpoh hynrei ka jingtih bad ka jingkhlong ha ka dur ban ïa khaii da ki spah trok ka dei kaba ngi la mih ban kren. Lada phi tih ban pynkylla sha ka jingsha lan, ngin ym ailad,” u la bynrap.
