Shillong, Nailar, 22: Ka Green Tech Foundation (GTF) ha ka sngi Thohdieng ka la maham tyngeh ïa ka National Highways & Infrastructure Development Corporation Limited (NHIDCL) ban um pynsniewdur ïa ka mariang bad ïa ki um ki wah da kaba theh ïa ki maw bad ka khyndew haba shna ïa ki surok ha kylleng ki bynta jong ka jylla.
Ka Foundation ka la aiti da ka dorkhas ha u Deputy General Manager ka Regional Officer ka NHIDCL ha ka sngi Thohdieng da kaba maham ïa ka NHIDCL ba kam dei ban pynjulor ïa ki um ki wah bad khamtam eh ba kam dei ban pynlong ïa ka wah Umtyngngar kum ka jaka theh khyndew katba ka jingshna ïa ka surok Shillong-Dawki ka dang ïaid shakhmat.
Ha ka jingïakren bad ki lad pathai khubor, u Chairman jong ka Green Tech Foundation (GTF) u Bah H. Bansiewdor Nonglang u la ong, “ngim shym la leit ban pyrshah ïa ka jingshna surok hynrei ka jingïakynduh jong ngi ïa ki bor ba dei khmih jong ka NHIDCL ka long dei beit thik tang ïa ka jingtheh khyndew sha ka wah Umtyngngar.”
U la ong ba ka Foundation kan sa nang ïai buddien ïa kane ka kam bad ïathuh ruh ba ka Meghalaya State Pollution Control Board (MSPCB) ka la pynmih da ka hukum kaba bthah ïa ka NHIDCL ba kan khat noh mardor ïa ka khyndew kaba la pynthud bad theh ha ka wah Umtyngngar.
Ka GTF ka la maham ruh ïa kino kino kiba shim kontrak na ka NHIDCL ba kim dei ban pynlong ïa ki wah kum ki jaka theh maw ne theh shyiap.
U Bah Nonglang u la ong ba kane ka jingtheh maw bad shyiap ha ka wah Umtyngngar ka la pynjaboh ïa ka um bad ka la ktah ruh haduh katta katta ïa ka umbam umdih bad pynpaw ruh ba ka jingtheh khyndew ka la pynlong mynta ïa ka wah Umtyngngar kum ka nala.
