Shillong, Nailar, 14: Ka Hill State People’s Democratic Party (HSPDP) ha ka sngi Balang ka la phah tuklar ha u Myntri Rangbah ka Jylla u Conrad K Sangma ban pynbna ïa ka ktien Khasi kum ka ktien Sorkar (official language) khnang ba kan plie lynti ïa ki samla khlem kam kiba ïakhun ïa ka eksamin thungkam ha ka Department of Posts (GDS Section) bad ha kiwei kiwei ki tnat treikam jong ka Sorkar Pdeng kiba don ha Meghalaya.
“
Ngi kyrpad ïa ka Sorkar lyngba jong phi, ban pynbeit thymmai ïa ka ktien Khasi, Garo da kaba pynmih ïa ka jingpynbna hapoh ka Meghalaya State Language Act 2005 Section 6 kum ki ktien Sorkar, khnang ban plie lad ïa ki samla khlem kam ba kin ïakhun da ka Khasi Language Marksheet Certificate kum ka ktien Sorkar, khnang ba kin dup lah ban ïakhun ïa ka eksamin thungkam ha ka Department of Posts (GDS Section) bad ha kiwei pat ki tnat treikam jong ka Sorkar Pdeng. Lah ban khanglad ïa ka jingpyndonkam katkum ka Meghalaya State Language Act 2005 katkum ka section 4 bad ki kyndon ktien Meghalaya State Language 2008 katkum ka Section 3, sub para (1,2,3,4 bad 5) katkum ka jingpynbna,” ong u President ka HSPDP u Bah KP Pangniang ha ka dorkhas ba la aiti sha u Sangma.
U la ong ba katkum ka jinglap jong ka party ha kaba ïadei bad ki Gram Dak Sevak ne ki Postman kiba trei ha ki thaiñ nongkyndong jong ka jylla Meghalaya kim shym la lah ban kren ne ïakren bad ki nongshong shnong namar ba kim don jingtip eiei ïa ki ktien shnong jong ngi. Ka jingeh ha ka ktien ka thylliej ka la wanrah ïa ki jingeh bad jingbym ïasngewthuh jingmut, ka jingpynslem bad ka jingbym ïaid beit ka jingtreikam.
U Bah Pangniang u la ïathuh ruh ba dang shen ka party ka la ïakynduh ïa u senior Post Master ban pan jingshai halor kane ka kam. Ka ophis ka la batai bad kdew ba ka mat ban thungkam ïa ki trai jylla kum ki Gram Dak Sevak ka shong ha ka Sorkar Pdeng, hynrei u la ban jur ruh ba ïa ka jingeh lah ban peit tang da ka sorkar jylla ban weng ïa ki jingeh.
“La sngewthuh ba ïa ka jingthungkam ïa ki Gram Dak Sevak la pynïaid da ka Ministry of Communication, Department of Posts (GDS Section). La ïoh jingtip ba ki nongthep kam ki dei kiba nabar ka jylla. bad namarba ïa ka rukom thungkam la leh beit katkum ki Marks ba la ïoh ha ka Marksheets Certificate jong ki kaba kham bha shibun ban ïanujor bad ki jong ngi, namarba ba ka ktien Hindi ka kham wan hakhmat,” u la ong bad bynrap “katba, nongshong shnong ba pura jong ka jylla Meghalaya ki la shah pynhap tang ha ka ktien Phareng ban ïoh ïa ka kam, namarba ka ktien Phareng katkum ka section 3 jong ka Meghalaya State Language Act 2005 nalor ka ktien Hindi ka la long ka ktien ba la pyndonkam ha ka jylla.”
U la kdew shuh shuh ba katkum ka Office Memorandum jong ka 25 tarik, Lber, , 2021, 9 tarik, Jylliew 2023 bad 10 tarik, Naitung, 2024 ba la pynmih da ka Ministry of Communications, Department of Post (GDS Section), watla ka la don ka jingpynbiang ïa ki ktien shnong na ka bynta ka jingïateh ha ka Gram Dak Sevaks, ka Ktien Khasi bad Garo ka dang sah kum ka “Associate Official Language.”
Katkum ka Meghalaya State Language Act 2005 section 4, ka ong, “watla kano kano kaba don ha ka Section 3 ïa ka ktien Khasi lah ban pyndonkam kum ka Associate Official Language na ka bynta baroh ki jingthmu ha ki District, ki Sub-Division bad ki Ophis Block Level jong ka Sorkar Jylla kiba don ha East Khasi Hills, West Khasi Hills, Jaiñtia Hills bad Ri Bhoi, u la ong.
Hadien kata, katkum ka jingpynbna ba la pynmih ha ka 12 tarik Jymmang, 2008 ba la kdew da ka Section 6 jong ka Meghalaya Language Act 2005, ka Section 4, ka ktien Khasi ka dang ïai neh kum ka Associate Official Language, katba ka ktien Phareng ka dang ieng kum ka ktien Sorkar katkum ka section 5 (Sub Para d), u la bynrap shuh shuh.
