Shillong, Risaw, 19: Ka Hynñiewtrep Youth Council (HYC) ka la dawa ïa ka Sorkar Jylla ban ïakren bad ka Sorkar Pdeng ban buh ïa ka ophis jong ka Narcotics Control Bureau (NCB) ha Shillong.
Ïa kane ka rai la shim ha ka jingïalang Central Executive Committee (CEC) kaba la long ha ka sngi Saitjaiñ.
Ha ka jingïakren bad ki lad pathai khubor u President ka HYC u Bah Roy Kupar Synrem u la ong lada don da ka ophis jong ka NCB ha Shillong kan ïarap ban peitngor ïa ka jingshalan tuh bad ka rah ka rong ïa u drok bad ïa kiwei kiwei ki jait jingdih kiba sniew na kiwei kiwei ki jylla shapoh ka jylla Meghalaya.
U Bah Synrem u la ong, dang shen u Myntri Khynnah ka tnat Kam Pohing ka Sorkar India u Nityananda Rai u la pyntip ba ka Meghalaya ka la kylla ka khyrdop rung na ka bynta ka jingkhaii tuh ïa u drok na ka jylla Manipur sha kiwei kiwei pat ki jylla jong ka ri India.
U la bynrap, ba ki shlem treikam jong ka NCB ki don mynta ha Assam, Arunachal Pradesh, Manipur bad ha Tripura hynrei ka jylla Meghalaya kam don satia ïa kane ka ophis watla ha ka jingshisha ka jingkhaii ïa u drok ka la nang kiew bha ha kane ka jylla Meghalaya.
“Namarkata, ka donkam ïa ka jingïatreilang bad ka jingpynduna ïa ka jingkhaii tuh ïa u drok bad ban peitngor bha ïa ka jingshalan tuh ïa ki mar khaii bad ïa kiwei kiwei de ki jait kam hapoh ka jylla, ka NCB ka dei ban don ïa ka shlem treikam hangne ha Meghalaya,” la ong shuh shuh u Bah Synrem.
Une u nongïalam jong ka HYC u la kyntu ruh ïa ka Sorkar ban buh ïa ka Special Police Unit ka ban tohkit kyrpang beit tang halor ka jingpynrung tuh ïa u drok sha kane ka jylla.
“Ka Sorkar ka la ban jer kyrteng da ka Special Police Unit ne da kano kano ka kyrteng lane ka lah ban long da ka kynhun ANTF kaba la don lypa hynrei kane ka Unit ka dei ban peit thik tang ïa ki kam kiba ïadei bad u drok, la ka long ban peitngor ïa ka rung ka mih shapoh ka jylla lane ban tohkit ïa ki case hapoh ka Narcotic Drugs and Psychotropic Substances (NDPS)” u la bynrap.
U Bah Synrem shuh shuh u la ong ba ka Sorkar Jylla ka dei ruh ban pynthikna ba ynda la thaw ïa kane ka Unit, ki Pulit jong kane ka kynhun ki dei ban ïoh ïa ki jingshah hikai pyntbit kiba biang kumno ban ïakhun thma pyrshah ïa u drok hapoh ki kyndon jong ka NDPS.
