Shillong, Ïaïong, 16: Ka Jaiñtia Students’ Union (JSU) ha ka sngi Balang ka la kyntu ïa ka Jaiñtia Hills Autonomous District Council (JHADC) ban ym ai No-objection Certificate (NOC) na ka bynta ban shna ïa ka lynti rel katba ym pat don ka aiñ kaba pyrkhing ïa ka jingrung kyrthep ki mynder kum ka Inner line permit (ILP).
Ha ka dorkhas ba la aiti sha u CEM ka JHADC u Bah Thombor Shiwat, ka JSU ka la pynpaw ruh ïa ka jingpyrshah lada ka don ka jingpyrshang ban ai NoC sha ka National Frontier Railways (NFR) na ka bynta ban shna ïa ka lynti Rel ne kano kano ka bynta kaba dei bad ka rel hapoh rilum Jaiñtia.
“Ngi kyntu ïa ka JHADC ban ym ai ïa kano kano ka jingmynjur ne ka jingbit kum ïa kine ki projek tad haduh ba ka Sorkar Meghalaya kan da ïoh ktien ka Sorkar India ban pyntreikam ïa ka Inner Line Permit (ILP) ha ka jylla,” la ong ka JSU bad bynrap, “ban ai ïa ka NoC khlem pat don ka ILP kan lam sha u pud u bym lah ban tehlakam ïa ka jingwan ki rung kyrthep ki mynder ri, ka ban buh jingma ïa ka jingbun briew, ïa ka kolshor, ka snap ba paka jong ki jaidbynriew Jaiñtia bad ïa ki jaidbynriew ritpaid jong ka Meghalaya baroh kawei.”
Shuh shuh, ka JSU ka la dawa ïa ka JHADC ban sangeh noh mardor ka jingai ïa ki Trading License ba thymmai bad ki jingai jingbit ha ka treikam treikam sha ki briew kiba nabar khamtam ha ki kam ba ki trai ri trai muluk ka district ki la lah ban trei hi dalade.
“Ngi ngeit skhem ba ki lad treikam treijam bad ïa ka khaii ka pateng hapoh ka district dei ban ailad shwa nyngkong eh sha ki trai shnong,” la bynrap ka seng.
Ka JSU ka la dawa ruh ïa ka jingdonkam ban talasi mardor bad pyrkhing ïa baroh ki dukan ba don laisen, ban jurip manla ka por bad ban weng noh ïa ki laisen kiba la paw ba ki dei kiba thok.
Ka seng ka la ong ba ka JHADC ka dei ban hukum ba ki trai dukan ki dei ban buh hakhmat dukan ïa ki kyrteng jong ki nongtrei bar jylla. Ki bym kohnguh ïa ka hukum dei ban pynduh jingithuh bad ban kyndang mardor ïa kum kine ki briew na ka jylla lada kim lah ban pynshisha.
Kumjuh ruh ka JSU ka la dawa ïa ka JHADC ban talasi bad ban pynshitom ïa kino kino ki briew kiba donkti katkum ka Benami Transactions (Prohibition) Act, 1998.
“Lada ka JHADC kam lah ban leh eiei pyrshah ïa kiba donkti ban leh Benami ka seng kam banse ban ujor sha Iingbishar ban ïoh ïa ka jingbishar kaba hok kum ïa kine ki kam leh thok,” la maham ka seng.
