Shillong, Nailar 11: Ka Khasi Students Union (KSU) East Jaiñtia Hills District Unit ha ka sngi Thohdieng ka la dawa ia ka Sorkar Meghalaya Democratic Alliance (MDA) ba kan pynstet ban shna ia ka Drug Reduction Elimination and Action Mission (DREAM) Draft Policy.
Ka seng kaba la buh hakhmat ia ka thong ban iakhun pyrshah ia ka jingjyllei shaba palat jong u drok hapoh ka East Jaiñtia Hills District bad ha ka jylla Meghalaya baroh kawei ka la aiti da ka dorkhas ha u Deputy Commissioner jong ka East Jaiñtia Hills District u Abhilash Baranwal kaba kynthup ia ki jingai jingmut kumno ban iada ia ki khynnah bad ia ki samla na u drok.
Ka East Jaiñtia Hills District ka dei kawei na ki distrik kaba jur bha ka jingkynrei bad jingwan tuid jong u drok na shabar.
Ha ka jingiakynduh ia u Deputy Commissioner, ka seng ka la ai jingmut ba la dei ban pynjur ia ka jingai jingpynshai halor ka jingma jong u drok sha ki skul khnang ba ki khynnah rit bad ki samla kiba dang khie dang san kin kiar na u drok. Ka seng ka la ai jingmut ia u DC ban khot da ka jingialang ia baroh ki kynhun bapher bapher ban iamir jingmut bad pynurlong ia kane ka thong.
Ka seng ka la ai jingmut ruh ba dei ban pynsdang noh ia ki jingai jingpynshai (awareness program) ha manla ki skul kiba don hapoh ka district manla ka step shwa ban long skul.
Ka Seng ka la kyntu ruh ia ki bor synshar District ban pynkhlaiñ shuh shuh ia ki bor pahara bad ba ka tnat Pulit kan iatrei lang ryngkat bad ki Seng Samla Shnong, ki Dorbar Shnong khnang ban pynduh jait ia ka jingjyllei jong u drok.
“Na ka liang u Deputy Commissioner u la pdiang ia ka jingiatreilang bad shen un sa wad shuh shuh ia ki lad ki lynti kumno ban iada ia ki khun samla na u drok,” la pyntip ka seng ha u kyrwoh ba la phah sha ki lad pathai khubor.
Ban ioh ia ka jingiatreilang jong ki Dorbar Shnong, ka seng ka la pynpaw ruh ba kan sa iakren ruh bad ki Dorbar Shnong bad ban jied ia ki shnong ban buh ia ka Community Gym kaba long kum shi bynta ka sienjam ban pynkiar ia ki samla na u drok. “Ka Community Gym kan long ba ki tiar ialehkai ki dei ban don ha manla ki shnong bad ka seng kan sa iakren bad ki Sports Club jong ki shnong ban wad ia ka iing bad jaka ban buh ia tiar ialehkai,” la pyntip ka seng.
Kane ka seinjam kan iarap ia ki khun samla ban pynleit jingmut ha kaba kilan met bad ban pynklet ia ki ban ngop ha ki jingsniew ba bun rukom, la bynrap ka KSU.
Ka Seng ka la ai jingmut ruh ban buh ki “De-addiction After Care Rehabilitation Centre” bad ka seng ka la pyntip ba kan sa shimti ban wad jaka bad ban pynsngewthuh sha ki shnong ban pdiang ia kane ka jingtyrwa.
Shuh shuh ka KSU ka la kyntu ruh ba ki paidbah kin iatreilang ryngkat bad ka Sorkar Jylla lem bad ka seng ban rat dyngkhong ia u drok bad ban ym khim jingmut ne tieng haba wan ki jingbha bad ki jingkylla.
