Shillong, Naitung, 24: Ki nongïalam jong ka Khasi Students Union (KSU) KSU Lummawbah Unit ha ka sngi Balang ki la leit ban ïakynduh ïa u Chief Engineer ka tnat PWD (Roads) ka Sorkar Jylla ha ka ophis treikam kaba don ha Lachumiere ban pynsngew halor ka jingjot shaba palat jong ka surok ha ka shnong Lummawbah kaba la buh jingma bad pynsuhsait ïa kiba bun balang khamtam ïa ki trai shnong bad ïa ki khynnah skul nalor ka surok ka long lypa kaba rit.
Ka seng ka la pynsngew ha u Chief Engineer ban maramot kham kloi ïa ka surok ha ka shnong Lummawbah bad ban pynsted ïa ka jingtreikam khnang ba kan wanrah ïa ka jingshngaiñ bad ka jingsuk ha ka leit ka wan jong kiba bun balang.
Ka Seng ruh ka la pan ïa ka jingpynshai na u Chief Engineer halor ka jingpynslem ban shna pynbha ïa ka surok ha kaba u la jubab ba ka don ka jingpynslem na ka liang jong kawei pat ka tnat kaba don ka jingïatreikam lang.
Hadien ka jingïakren kaba lyngkot u Chief Engineer u la kular ban shimkhia ïa ka kam bad ban pynsted ban phah maramot bad ban pynbha ïa ka surok ha ka shnong Lummawbah.
Ha ka jingïakynduh ïa u Chief Engineer la lamkhmat da u President ka seng u samla Hopefulborn L.Mawnai bad kiwei kiwei ki nongïalam.
