Shillong, Naitung 11: Ka Meghalaya Peoples Human Rights Council (MPHRC), ka la pynrem jur halor ka jingkynnoh ba la pynshitom beiñ ïa u samla Getwin Jyrwa, 19 snem ka rta da ki Pulit ha Sohra Police Station bad uba la shah kynnoh ba u leh ïa ki kam jakhlia paidbah bad leh thombor katkum ka ejahar ba la mudui ha ka 1tarik mynta u bnai da u Rangbah Shnong jong ka shnong Mawkisyiem, Sohra.
“Da kaba ïaroh ïa ka jingshimkhia mardor ba la bthah da u Superintendent of Police ka East Khasi Hills u Bah Vivek Syiem, da kaba sospon mardor ïa ki san ngut ki Pulit ba kynthup ïa uwei u Sub-Inspector (SI) bad saw ngut ki Pulit Langrut Un-armed Branch (UB) ka Sohra Police Station, ka pynthikna ba ki Pulit ki la pynshitom beiñ hapoh thanat, kiba shyrkhei ne leh riewkhlaw pyrshah ïa u samla Getwin Jyrwa,” ong ka MHRC ha u kyrwoh ba la phah sha ki lad pathai khubor lyngba u Chairman u Bah Dino D.G. Dympep.
“Kane ka jingjia ka dei ka jingpynkheiñ ïa ka hok longbriew manbriew jong ki nongshong shnong kaba mih na ki jingpynshitom beiñ ba shyrkhei bad ki Pulit kiba donkti ban pynshitom beiñ ki dei ban shah pynshitom mardor” ong u Chairman ka MPHRC.
“Lada don kano kano ka kam ba la leh da u heh ophisar kaba pynkheiñ ïa ka hok longbriew manbriew ka Sorkar ka hap ban shim ïa ka jingkitkhlieh ne ka hap ban shimkhia na ka bynta ka kam ba la leh da ki nongtrei Sorkar pyrshah ïa ki nongshong shnong,” ong ka MPHRC.
“Katkum ka Global Torture Index Report 2025, ba la pynmih da ka The Global Alliance of Anti Torture Organisation ïa kaba la pyllait dang shen ha ka jingïalang kaba 59 jong ka UN Human Rights Council kaba la long dang shen ha Geneva, Switzerland, ka kaiphod jong ka Index Report ka la ai ïa ka India ha ka kyrdan kaba don jingma bha da ka jingbishar bniah ïa ki jait jingshah pynshitom beiñ bapher bapher,” la bynrap u krywoh.
Ka MPHRC ka la ong ba ka Sorkar ka dei ban buh jingmut ba ki nongshong shnong ki ïoh ïa ka hong longbriew manbriew bad ym ïa ki briew kiba la shah kynnoh ki bym don ïa ka jingkitkhlieh kum ki shakri paidbah.
“Ka jingtohkit kaba kloi, kaba khlem ïashah liang bad kaba bniah halor ka rukom pynshitom beiñ jong ki Pulit kaba dang ïaid shakhmat ha Sohra Police Station ka dei ban pynthikna ïa ka jingbymïashah liang,” la dawa ka MPHRC.
