Shillong, Nailar 17: Ka North East Students’s Organisation (NESO) ka la pynbna ban pynlong ïa ka Sit in Strike ha ka sngi Nyngkong ka 18 tarik Nailar, ha man ki Nongbah jong ki Jylla ka thaiñ Shatei Lam Mihngi, ban pynsngew bad pynbor ïa ki Sorkar jylla bad ka Sorkar Pdeng ba kin shna ïa ki aiñ ki ban pyrkhing ïa ka jingrung laitlan ki poi ei.
Katkum ka kyrwoh la ong ba ka NESO ka la shim ïa kane ka rai ha ka jingïalang kaba long ha Guwahati myn ha ka 6 tarik Nailar. Kane ka jingïakhih kan long ha Guwahati, Shillong, Itanagar, Aizawl, Kohima, Imphal bad Argartala.
La ong ba hangne ha nongbah Shillong, ka Khasi Students’ Union (KSU) kaba dei ka dkhot ka NESO, kan pynlong ïa kane ka jingïakhih ha Khyndailad hakhmat ka Assembly. Kane ka jingïakhih kan sdang naduh ka por 12 baje mynsngi haduh 3 baje nohphai sngi, ong u kyrwoh ba la phah da u General Secretary ka KSU u samla Donald V Thabah.
