PYNREM JUR ÏA WAHEH SHNONG, THANGSKAI
Shillong, Nailur, 08: Ka Synjuk Waheh Shnong (SWS) East Jaintia Hills District, ha ka sngi thohdieng ha ka jingialang jong ka Executive Committee da kawei ka sur ka la rai ban pynrem jur ia u Waheh Shnong jong ka shnong Thangskai, East Jaintia Hills uba ai syrnot nongshongshong bapura (Permanent Residential Certificate) ia u wei u bar jylla u bym dei satia u trai ri trai muluk na ka shnong Thangskai, kat haduh ba ka syrnot ka la ktah wat ia ka bhah pule Doctor jong ki khun ka Bri u Hynñiewtrep.
“Ka jingleh jong u Waheh Shnong ka shnong Thangskai, nalor ba ka la tuh ia ka bhah pule Doctor jong ki khun ka Bri u Hynñiewtrep, kane kan sa ktah ruh ia ka jaitbynriew trai ri trai muluk ba rit paid jong ngi hadien habud. Kumta, ka SWS-East Jaintia Hills District, ka pynrem jur ia kane ka jingleh jong u Waheh Shnong,” ong u President ka SWS-EJHD u Ma Hambertus Nongtdu ha u kyrwoh ba la phah sha ki lad pathai khubor.
U President ka synjuk, u la ong, “kane ka jingleh jong u Waheh Shnong, ka la wanrah ruh ia ka jingjahburom bad ka jingduh jingshaniah ia kiwei ki Waheh Shnong jong ka East Jaintia Hills District. Kumta, lyngba une u kyrwoh, ka Synjuk, ka la dawa ïa ka Dorbar Shnong Thangskai bad ïa ki bor sorkar kynthup ia ka Jaiñtia Hills Autonomous District Council (JHADC), ban pynduh pyndam noh shisyndon ia ka syrnot jong u bar jylla.”
U kyrwoh u la ong shuh shuh ba ka Synjuk kam lah ban pdiang ia ka Shnong Thangskai kaba buh pynban ia ka Jaitbynriew ha ka jingeh bad ka jingma. “Ka SWS-EJHD, mynta hi ka sngi lyngba une u kyrwoh, ka la rai ban kyntu bad ka pynkynmaw ia baroh ki Dorbar Shnong ne ia ki waheh Shnong ha East Jaintia Hills District, ba ki dei ban long kiba husiar bha ha kaba ai ia ki syrnot bapher bapher, khnang ba kane kan ym buh ia ka ri bad ka jaitbynriew ritpaid jong ngi ha ka jingeh hadien habud,” la bynrap u kyrwoh.
Ka SWS-EJHD ka kyntu ruh ia ki bor Sorkar bad ruh ia kiwei kiwei pat ki bor ba ki dei ban da bishar bniah bha ia baroh ki syrnot na ki shnong ba la aiti sha ki bad ban pyntip wut wut sha ki Dorbar Shnong lada don kino kino ki jait syrnot kiba i shankhmat.
“Na ka bynta ka iap ka im jong ka ri bad ka jaibynriew ka Synjuk ka la rai ba nangne shakhmat yn shna noh tang kawei ka dur ka dar (format) na ka bynta ki syrnot bapher bapher ia kiba yn sa pyndonkam ryntih ha baroh ki shnong ha East Jaintia Hills District, bad kumba ka long mynta kane ka kam ka dang don hapoh ka jingbishar bniah jong ka SWS-East Jaintia Hills District,” la iathuh u kyrwoh.
