Shillong, Jymmang, 12: Ka Women’s Wing bad Youth Wing jong ka Voice of the People Party (VPP) ki la dawa ïa ka Sorkar Jylla ban buh khamm bun ki Common University Entrance Test (CUET) Examination Centre ha ka jylla hadien ba ka National Testing Agency (NTA) ka la rai ba phah thoh eksamin ïa ki samla pule shabar ka jylla Meghalaya.
Ha ka shithi ba la phah sha u Myntri ka tnat Pule Puthi u Rakkam A Sangma ba la soi da ka President jong ka Women’s Wing Kong Phileta Syiem bad u Secretary ka Youth Wing Bah Nathaniel Mawrie ki la ong ong, bun na ki samla pule bad ki kmie ki kpa ki la pynpaw ïa ka jingsngewkhia kaba jur watla ki la jied ïa ka Meghalaya kum ka jaka thoh eksamin kaba ki kwah hynrei bun ki la shah pynngat shabar jong ka jylla bad kane ka la wanrah ïa ka jingeh ha ka liang ka jinglut jingsep ha ka leit ka wan ban leit shabar ka jylla bad khamtam ïa kiba bun ki bym kotbor.
“Watla ngi pdiang ïa ki jingpyrshang ba dang shen jong ka NTA ban pynkynriah ïa kiba bun ki jaka eksamin na ka bynta ki samla pule Meghalaya kiba don hapoh ka jylla Meghalaya sha Shillong, hynrei, ka paw shai ba ka jingbun ki samla pule ki dang shah pynngat sha ki jaka thoh eksamin shabar ka jylla Meghalaya. Kane ka jinglong jingman kam pynthut tang ïa ka jingpynkhreh eksamin jong ki hynrei ka buh jingeh ruh ïa ki samla pule ban ïakhun ïa ka eksamin kaba donkam,” la pynpaw ka dorkhas.
Ka VPP ka la ai jingmut ruh ïa ka Sorkar kan buh da ka Help Desk bad ka Online Portal ha kaba ki samla pule kin dup lah ban register ïa ki Centre ba la mang. Kane kan ïarap ban pynthikna ïa ka jingdon jong ki samla pule kiba shah ktah.
Shuh shuh, ki nongïalam ka VPP ki la ong ba ka long kaba sngewsih wat hadien lai snem ba la pyntreikam ïa ka CUET ha u snem 2022, ym pat lah ban buh ïa ki jaka ihoh eksamin kiba bïang ha Meghalaya.
“Ngi kyntu ïa ka Sorkar ban weng ïa kane ka jingduna da kaba thaw shuh shuh ïa ki Centre hapoh ka jylla, ban pynthikna ba ki samla pule kin ïoh lad ban ïakhun ïa ki Test khlem da mad ïa ka jinglut ksan da kaba leit shabar ka jylla bad sngewbha ban buh jingmut ba ka jingpyllait na ka jingïakhun ïa ka CUET kan pynduhnong hi ïa ki samla pule jong ngi ban aireng ha ki entrance test ha ka national level bad kan khanglad ïa ki ban aplai ïa ki Integrated Programe ba la tyrwa da ka NEHU bad kiwei kiwei ki shlem pule kiba don shabar jong ka jylla. Ngi kyrmen ba phin shimkhia ïa kane kum ka kam ba kyrkieh bad ban shim ïa ki sienjam ban pynthikna ba ki samla pule kin ïoh ban ïakhun ïa ka eksamin CUET-UG ha ka jylla,” la bynrap shuh shuh ka VPP.
