Shillong, Naitung 24: Ka kynhun jong ki Nurse kiba trei kum ki Contractual ha ki shlem sumar bapher bapher ha kane ka jylla ha ka sngi Balang ki la ïakynduh ïa ka Myntri kaba khmih tnat ka Koit ka Khiah ka Dr. Ampareen Lyngdoh ban ïakren bad ban ïathir ïatai ha kaba ïadei bad ka jingpynbna jong ka tnat ka Koit ka Khiah ban pyndap ïa ki 325 tylli ki Contractual Post katkum ka Advertisement kaba la pynmih ha ka 8 tarik, Naitung, 2024.
U Bah Lurstep Nongrum ha ka jingïakren bad ki lad pathai khubor u la ïathuh ba ha ka jingïakren bad ka Myntri la pyntip ba kin don pat sa 164 tylli ki permanent post ban sa pynmih ïa ka Advertisement ha kaba kut taiew jong u Naitung, 2024 ne ha ka taiew banyngkong jong u Nailar, 2024.
U la ong ruh ba ka jingdawa ka long ban pynkut noh ïa ka jingthungkam Contractual hapoh 11 bnai bad ban pynbna ïa ka jingthungkam pura ïa ki Nos.
Kane ka kynhun jong ki Nos ki la kyntu ruh ïa ka Myntri ka Koit ka Khiah ban pynjlan ïa ka rta thepkam ïa ki Khasi-Jaiñtia bad Garo na ka 27 snem sha ka 30 snem.
“Ka Myntri ka la pynpaw ba kan hap ban ïashong pyrkhat halor kane ka jingdawa namarba kan ktah lang ïa kiwei pat ki tnat treikam jong ka Sorkar Jylla lada pynjlan ïa ka rta thungkam,” u la ong.
