Shillong, Rymphang, 01: Ka Meghalaya Editors’ & Publishers’ Association (MEPA) bad ka Shillong Press Club (SPC) ki la aipor ïa u President jong ka Voice of the People Party (VPP) u Bah Ardent Miller Basaïawmoit uba long ruh u MLA jong ka Nongkrem Constituency ba u dei ban panmap hapoh san sngi halor ki jingkynnoh ba khlem nongrim ïa ki ar tylli ki lad pathai khubor ba kynthup ïa ka Batesi Tv bad ïa ka lad pathai khubor T7.
Kane ka jingdawa panmap kine ki ar tylli ki kynhun ka long halor ka jingkren jong u Bah Ardent ha ka jingïalang paidbah ba la pynlong da ka VPP ha Nongstoiñ, West Khasi Hills District ha ka 15 tarik Kyllalyngkot, 2025
Ki la ong shuh shuh ba kane ka jingkynthoh jong u Bah Ardent ka dei ka jingpynjah burom ïa kine ki ar tylli ki lad pathai khubor bad ka buh jingma ïa ka jingshngain ha ka ïaid ka ieng jong ki nonglum khubor na kine ki ar tylli ki lad pathai khubor.
Ha ka shithi ba la phah sha u President jong ka VPP, ka Meghalaya Editors’ & Publishers’ Association bad ka Shillong Press Club ki la maham ba lada u Bah Ardent um panmap hapoh kane ka por ba la buh, kine ki ar tylli ki kynhun kim banse ban leh eiei pyrshah ïa u Bah Ardent bad ïa ka Party jong u ka Voice of the People Party.
Ïa ka shithi ba la soi da u President jong ka Shillong Press Club u Bah Deimaïa Siangshai bad u Vice President jong ka MEPA u Rajiv Choudhury ki la ong ba ka jingdawa ïa ka jingpynshai na u President ka VPP ka long halor ka nongrim ba ka khubor ba la pynmih da kine ki ar tylli ki lad pathai khubor ki dei kiba shisha bad ki dei ki bym don kano kano ka jingpyrshang ban ktah mationg ne ban pynthohbria ïano ïano ruh ne ïa ki sengsain pyrthei.
Ka Meghalaya Editors’ & Publishers’ Association bad ka Shillong Press Club ka la ong ruh, yn ym don satia kino kino ki seng sainpyrthei, ki sengbhalang, ki seng kiengatiar lane ki nongïalam jong kino kino ki kynhun kiba lah ban buh jingkylli ïa ka kam ba la trei kum ki nongthoh khubor bad ki nonglum khubor.
