Shillong, Lber, 19: Ka Chairperson jong ka Meghalaya State Commission for Protection of Child Rights (MSCPCR) ka Agatha Sangma lyngba u kyrwoh ha ka sngi Balang ka la pynrem jur ïa ka jingjia ha ka jylla Karnataka ha kaba ar ngut ki khynnah na ka jylla Meghalaya ki la duhei ïa la ka jong ka jingim ba kynthup ïa iwei na ka shnong Lyndem, Pynursla bad iwei na ka shnong Sohparu, Nongstoiñ.
Ka Chairperson ka la pynrem jur ïa kito kiba donkti ban iuhroit ïa ka hok jong ki khynnah bad ka Commission ka la ïatreilang bad ka Karnataka State Commission for Protection of Child Rights ban pynthikna ba dei ban pynshitom ïa kito kiba donkti bad ruh ban ïarap ban peit ïa ka koit ka khiah bad ka bha ka miat jong ki 22 ngut kiwei pat ki khynnah na ka jylla Meghalaya kiba la shah ktah ha kane ka jingjia.
Ka Chairperson ka la kyrpad ïa ka Karnataka State Commission for Protection of Child Rights ban ai ïa ka kaiphod kaba bniah ban lap ïa ki jingduna kiba lam shaduh u pud ban pynkhein ïa ka hok ïada ïa ki khynnah.
